மோட்டார் சைக்கிள் மீது காட்டுப்பன்றி மோதல்: அரிசி வியாபாரி பலி

ஆலங்குளம்:

ஆலங்குளம் அருகே உள்ள ஆலடிப்பட்டியைச் சேர்ந்தவர் ஆசிர் ஜெய்சன் (வயது 46). இவர் நல்லூரில் அரிசி வியாபாரம் செய்து வந்தார். ஒரு வாரங்களுக்கு முழு ஊரடங்கு அமல்படுத்தப்பட்டதால், நேற்று முன்தினம் ஆசிர் ஜெய்சன் ஆவுடையானூரில் உள்ள தனது அக்கா வீட்டிற்கு பலசரக்கு பொருட்களை கொடுப்பதற்காக மோட்டார் சைக்கிளில் சென்றார். பின்னர் அங்கு இருந்து இரவில் ஆலங்குளம் நோக்கி வந்து கொண்டிருந்தார். 

ஆலங்குளம் அருகே ஆண்டிப்பட்டி விலக்கு அருகே வந்த போது, காட்டுப்பன்றி ஒன்று ஓடி வந்து ஆசிர் ஜெய்சனின் மோட்டார் சைக்கிளில் மோதியதாக கூறப்படுகிறது. இதில் நிலை தடுமாறி கீழே விழுந்த அவர் தலையில் பலத்த காயம் அடைந்து சம்பவ இடத்திலேயே பரிதாபமாக இறந்தார்.

இதுகுறித்து தகவல் அறிந்த ஆலங்குளம் போலீசார் சம்பவ இடத்திற்கு சென்று ஆசிர் ஜெய்சனின் உடலை கைப்பற்றி பிரேத பரிசோதனைக்காக பாளையங்கோட்டை அரசு ஆஸ்பத்திரிக்கு அனுப்பி வைத்தனர். மேலும் விபத்து குறித்து வழக்குப்பதிவு செய்து விசாரணை நடத்தி வருகின்றனர்.