<
கொரோனா சித்த மருத்துவ சிகிச்சை மையம்
மயிலாடுதுறையில் கொரோனா சித்த மருத்துவ சிகிச்சை மையத்தை அமைச்சர் மெய்யநாதன் திறந்து வைத்தார்.
மயிலாடுதுறை:
மயிலாடுதுறையில் கொரோனா சித்த மருத்துவ சிகிச்சை மையத்தை அமைச்சர் மெய்யநாதன் திறந்து வைத்தார்.
அமைச்சர் ஆய்வு
மயிலாடுதுறை அரசு மருத்துவமனையில் அமைச்சர் மெய்யநாதன் பார்வையிட்டு ஆய்வு செய்தார். தொடர்ந்து கொரோனா வார்டில் அளிக்கப்பட்டு வரும் சிகிச்சைகள் குறித்து கேட்டறிந்தார். இதனைத் தொடர்ந்து உதவி கலெக்டர் அலுவலகம் அருகில் அரசு மகளிர் விடுதியில் புதிதாக உருவாக்கப்பட்ட சித்த மருத்துவ சிகிச்சை மையத்தை அமைச்சர் திறந்து வைத்தார்.
தொடர்ந்து சித்த மருத்துவ மூலிகைகளையும், மருந்துகளையும் அமைச்சர் பார்வையிட்டார். பின்னர் அதே வளாகத்தில் அமைக்கப்பட்டுள்ள நோயாளிகளுக்கான படுக்கைகளை அமைச்சர் பார்வையிட்டு ஆய்வு செய்தார்.
இதனைத் தொடர்ந்து அமைச்சர் நிருபர்களுக்கு பேட்டி அளித்தார். அப்போது அவர் கூறியதாவது:-
சித்த மருத்துவ சிகிச்சை மையத்தில் 50 படுக்கைகள் உள்ளன. கொரோனா தொற்று ஆரம்ப அறிகுறி உள்ளவர்கள் இங்கே அனுமதிக்கப்பட்டு உரிய சிகிச்சை அளிக்க ஏற்பாடு செய்யப்பட்டுள்ளது. கடந்த 2 நாட்களாக மயிலாடுதுறை மாவட்டத்தில் கொரோனா தொற்று பரவல் சற்று குறைந்துள்ளது.
உரிய சிகிச்சை அளிக்கப்படும்
மயிலாடுதுறை அரசு மருத்துவமனையில் 6 கிலோ லிட்டர் கொள்ளளவு கொண்ட திரவ ஆக்சிஜன் பிளான்ட் நிறுவப்பட்டுள்ளது. சில குறைபாடுகள் விரைவில் களையப்பட்டு ஒரு வாரத்திற்குள் ஆக்சிஜன் பிளான்ட் பயன்பாட்டிற்கு கொண்டு வரப்படும். அதன் பிறகு மயிலாடுதுறை அரசு மருத்துவமனைக்கு தேவையான ஆக்சிஜன் அதில் இருந்து பெற்றுக்கொள்ள முடியும். மயிலாடுதுறை அரசு மருத்துவமனையில் பணிபுரியும் 28 செவிலியர்களுக்கு கொரோனா நோய் பரவல் ஏற்பட்டதாக அறிந்தேன். அவர்களுக்கு உரிய சிகிச்சை அளிக்கப்படும். செவிலியர் பற்றாக்குறையை போக்க புதிதாக செவிலியர்களை நியமிக்க மாவட்ட கலெக்டர் உரிய நடவடிக்கை எடுப்பார் என்றார்.
அப்போது அவருடன் மாவட்ட கலெக்டர் லலிதா, ராமலிங்கம் எம்.பி., எம்.எல்.ஏ.க்கள் நிவேதா முருகன், ராஜகுமார், பன்னீர்செல்வம், மாவட்ட போலீஸ் சூப்பிரண்டு ஸ்ரீநாதா, மாவட்ட வருவாய் அலுவலர் முருகதாஸ் மற்றும் அரசு டாக்டர்கள், அரசு அதிகாரிகள் இருந்தனர்.
சீர்காழி அரசு மருத்துவமனையில்
சீர்காழி அரசு மருத்துவமனையில் அமைச்சர் மெய்யநாதன் ஆய்வு பணி மேற்கொண்டார். அப்போது தலைமை டாக்டர் பானுமதியிடம் கொரோனா நோயாளிகளுக்கு வழங்கப்படும் சிகிச்சைகள் குறித்தும், மருத்துவமனையில் தேவையான அடிப்படை வசதிகள் உள்ளதா? என்பது குறித்தும் கேட்டறிந்தார்.
அப்போது கூடுதலாக டாக்டர்கள், செவிலியர்கள், பணியாளர்கள் நியமனம் செய்ய வேண்டும் என தலைமை டாக்டர், அமைச்சரிடம் கேட்டுக் கொண்டார்.
இதனை தொடர்ந்து அமைச்சர் கூறுகையில், தமிழக முதல்-அமைச்சர் மு.க. ஸ்டாலின் எடுத்து வரும் துரித நடவடிக்கையால் கொரோனா வைரஸ் தொற்று தடுக்கப்பட்டு வருகிறது. மேலும் தொடக்க நிலையிலேயே வீடு வீடாக சென்று பரிசோதனை செய்யப்பட உள்ளது. குறிப்பாக மயிலாடுதுறை மாவட்டத்தில் கொரோனா வைரஸ் தொற்று இல்லாத அளவிற்கு பணிகள் துரிதப்படுத்தப்பட்டு உள்ளது என்றார்.
ஆய்வின்போது தாசில்தார் ஹரிஹரன், சீர்காழி தி.மு.க. நகர செயலாளர் சுப்பராயன், சீர்காழி மேற்கு ஒன்றிய பொறுப்பாளர் பிரபாகரன் உள்ளிட்ட பலர் உடனிருந்தனர்.
பொறையாறு
மயிலாடுதுறை மாவட்டம் தரங்கம்பாடி அரசு மருத்துவமனையில் நேற்றுஅமைச்சர் சிவ.வீ.மெய்யநாதன், ஆய்வு மேற்கொண்டார். அப்போது அவர் டாக்டர்களிடம் மருத்துவ மனையில் அடிப்படை வசதிகள், அங்கு வரும் நோயாளிகளின் சிகிச்சை குறித்தும் கேட்டறிந்தார்.
கொள்ளிடம்
மயிலாடுதுறை மாவட்டம் கொள்ளிடம் அருகே உள்ள புத்தூர் எம்.ஜி.ஆர.் அரசு கலை மற்றும் அறிவியல் கல்லூரியில் 80 படுக்கை வசதிகளை கொண்ட கொரோனா சிகிச்சை மையம் இயங்கி வருகிறது. அந்த மையத்திற்கு அமைச்சர் மெய்யநாதன் நேரில் சென்று பார்வையிட்டு ஆய்வு செய்தார். இதில் கொள்ளிடம் ஒன்றியக்குழு தலைவர் ஜெயபிரகாஷ், வட்டார மருத்துவ அலுவலர் ரமேஷ்குமார், கொள்ளிடம் மேற்கு ஒன்றிய செயலாளர் செல்லசேது ரவிக்குமார், கிழக்கு ஒன்றிய செயலாளர் மலர்விழி திருமாவளவன் மற்றும் பலர் கலந்து கொண்டனர்.
திருக்கடையூர்
மயிலாடுதுறை மாவட்டம் ஆக்கூர் அரசு ஆரம்ப சுகாதார நிலையத்தில் தடுப்பூசி முகாமை அமைச்சர் மெய்யநாதன் பார்வையிட்டு ஆய்வு செய்து, கொரோனா தடுப்பூசி முகாமை தொடங்கி வைத்தார். மேலும் அங்கு மேற்கொள்ளப்பட்டு வரும் பணிகள் குறித்து கேட்டறிந்தார்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
