காரைக்குடி அரசு ஆஸ்பத்திரியில் கொரோனாவுக்கு 3 பேர் பலி

காரைக்குடியில் உள்ள மாவட்ட தலைமை மருத்துவமனையில் நேற்றுமுன்தினம் 300 படுக்கை வசதிகளோடு கொரோனா சிறப்பு சிகிச்சை மையம் தொடங்கப்பட்டது. இ்ந்த மையத்தில் 200 ஆக்சிஜன் சிலிண்டருடன் கூடிய படுக்கை வசதி உள்ளது.
இந்நிலையில் கொரோனா சிகிச்சை பெற்று வந்தவர்களில் 7 பேர் இறந்து விட்டதாக வதந்தி பரவ தொடங்கியது. இதனால் மாவட்ட தலைமை மருத்துவமனை முன்பு சிகிச்சை பெற்று வந்த நோயாளிகளின் உறவினர்கள் திரண்டனர். அங்கு போலீசார் குவிக்கப்பட்டனர்.
அதனையொட்டி மாவட்ட கலெக்டர் மதுசூதன் ரெட்டி, கோட்டாட்சியர் சுரேந்திரன், தாசில்தார் அந்தோணிராஜ் ஆகியோர் மாவட்ட தலைமை மருத்துவமனைக்கு விரைந்தனர். அங்கு கொரோனா சிகிச்சை மையத்தில் சிகிச்சை பெற்று வந்த நோயாளிகளை பார்வையிட்டனர்.அவர்களுக்கு அளிக்கப்படும் சிகிச்சைகள் குறித்து டாக்டர்களிடம் கேட்டறிந்தனர்.
பேட்டி
பின்னர் மாவட்ட கலெக்டர் மதுசூதன்ரெட்டி நிருபர்களுக்கு பேட்டி அளித்தார். அப்போது அவர் கூறியதாவது:-
 தற்போது இங்கு 179 பேர் சிகிச்சை பெற்று வருகின்றனர். இவர்களில் 76 பேர் ஆக்சிஜன் சிலிண்டர் வசதிகளோடு சிகிச்சை பெற்று வருகின்றனர். சிகிச்சைக்கு தேவையான ஆக்சிஜன் வசதிகள் மற்றும் படுக்கை வசதிகள் போதுமான அளவில் உள்ளது. சிகிச்சை பெற்று வந்த நோயாளிகளில் 3 பேர் தேவையான சிகிச்சைகள் முழுமையாக அளிக்கப்பட்டும் உயிரிழந்தனர். மற்றபடி வதந்திகளை யாரும் நம்ப வேண்டாம்.
இவ்வாறு அவர் கூறினார்.