தூத்துக்குடியில் வேலைவாய்ப்பு அலுவலக பதிவை புதுப்பிக்க வாய்ப்பு- கலெக்டர் செந்தில் ராஜ் தகவல்

தூத்துக்குடி, ஜூன்:

தூத்துக்குடி மாவட்டத்தில் வேலைவாய்ப்பு அலுவலக பதிவை புதுப்பிக்க வாய்ப்பு அளிக்கப்பட்டு உள்ளது.

இதுகுறித்து தூத்துக்குடி மாவட்ட கலெக்டர் செந்தில்ராஜ் வெளியிட்டுள்ள செய்திக்குறிப்பில் கூறி இருப்பதாவது:-

2017, 2018 மற்றும் 2019 ஆகிய ஆண்டுகளில் வேலைவாய்ப்பு அலுவலகப் பதிவை பல்வேறு காரணங்களால் புதுப்பிக்கத் தவறிய பதிவுதாரர்கள் பணி வாய்ப்பை பெறும் வகையில் மீண்டும் ஒருமுறை புதுப்பித்துக் கொள்ள ஏதுவாக சிறப்பு புதுப்பித்தல் சலுகை வழங்கப்பட்டு உள்ளது. தூத்துக்குடி மாவட்டத்தில் இந்த சலுகையை பெற விரும்பும் பதிவுதாரர்கள் கடந்த 28-ந் தேதி முதல் 3 மாதங்களுக்குள், அதாவது 27.08.21-க்குள் ஆன்லைன் மூலம் தங்கள் பதிவை புதுப்பித்துக் கொள்ளலாம்.

அவ்வாறு ஆன்லைன் மூலம் பதிவை புதுப்பிக்க முடியாதவர்கள் குறிப்பிட்ட தேதிக்குள் சம்பந்தப்பட்ட வேலைவாய்ப்பு அலுவலகத்துக்கு பதிவு தபால் மூலமாக விண்ணப்பம் அளித்தும் புதுப்பித்துக் கொள்ளலாம். ஆன்லைன் மூலமாக புதுப்பித்தல் மேற்கொள்ளும் போது வேலைவாய்ப்பு மற்றும் பயிற்சித் துறையின் http://tnvelaivaaippu.gov.in/ என்ற இணையதள முகவரியை பயன்படுத்தி 27.8.2021 வரை பதிவுதாரர்கள் தங்களது பதிவை புதுப்பித்துக் கொள்ளலாம்.

இவ்வாறு அதில் கூறப்பட்டு உள்ளது.