மேலும் 620 பேருக்கு கொரோனா பாதிப்பு

விருதுநகர்,ஜூன்

விருதுநகர் மாவட்டத்தில் மேலும் 620 பேருக்கு கொரோனா தொற்று உறுதி செய்யப்பட்டுள்ளது.

12 பேர் பலி

விருதுநகர் மாவட்டத்தில் நேற்று மேலும் 620 பேருக்கு கொரோனா தொற்று உறுதியாகியுள்ள நிலையில் பாதிப்பு எண்ணிக்கை 38 ஆயிரத்து 322 ஆக உயர்ந்துள்ளது. நேற்று 776 பேர் குணம் அடைந்து வீடு திரும்பினர். இவர்களையும் சேர்த்து இதுவரை 29 ஆயிரத்து 674 பேர் சிகிச்சை முடிந்து வீடு திரும்பி உள்ளனர்.

தற்போது 8 ஆயிரத்து 126 பேர் அரசு மற்றும் தனியார் ஆஸ்பத்திரிகளில் சிகிச்சை பெற்று வருவதோடு வீடுகளிலும் தனிமைப்படுத்தப்பட்டு உள்ளனர். நோய் பாதிப்புக்கு மேலும் 12 பேர் பலியான நிலையில் பலி எண்ணிக்கை 428 ஆக உயர்ந்துள்ளது. 

படுக்கைகள்

இம்மாவட்டத்தில் அரசு ஆஸ்பத்திரிகளில் 1,198 படுக்கைகள் உள்ள நிலையில் 947 படுக்கைகளில் நோய் பாதிக்கப்பட்டோர் அனுமதிக்கப்பட்டுள்ளனர். 251 படுக்கைகள் காலியாக உள்ளன. சிகிச்சை மையங்களில் 1,573 படுக்கைகள் உள்ள நிலையில் 898 பேர் சிகிச்சைக்காக அனுமதிக்கப்பட்டுள்ளனர். 675 படுக்கைகள் காலியாக உள்ளன.

நோய் பாதிப்பு

இம்மாவட்டத்தில் நேற்றும் பரவலாக நோய் பாதிப்பு ஏற்பட்டுள்ளது. விருதுநகர் ஆனிமுத்து பிள்ளையார் கோவில் தெரு, அம்பேத்கர் தெரு, ஏ.எஸ்.எஸ்.எஸ் ரோடு, வடமலைக்குறிச்சி, எல்.பி.எஸ். நகர், ஒண்டிப்புலி, அண்ணாமலை தெரு, குல்லூர் சந்தை, மாத்திநாயக்கன்பட்டி ரோடு, ஈ.பி காலனி, கே.கே.எஸ்.எஸ்.என். நகர், காந்தி நகர், ஏ.ஏ.ரோடு, நந்தவனம் தெரு, கருப்பசாமி நகர், செவல்பட்டி அரசு ஆஸ்பத்திரி உள்ளிட்ட பகுதிகளில் பாதிப்பு ஏற்பட்டுள்ளது.

மேலும் கிழவிகுளம், புதூர், செங்கப்படை, நாலூர், ஏ.முக்குளம், மேல துலுக்கன்குளம், துலுக்கப்பட்டி, மல்லாங்கிணறு, காரியாபட்டி, திருத்தங்கல், சிவகாசி, ஸ்ரீவில்லிபுத்தூர், ராஜபாளையம், சாத்தூர், அருப்புக்கோட்டை, வெம்பக்கோட்டை, பந்தல்குடி, பாலையம்பட்டி, படந்தால், திருத்தங்கல், வத்திராயிருப்பு உள்ளிட்ட பகுதிகளில் உள்ள கிராமப் பகுதிகளிலும் நோய் பாதிப்பு ஏற்பட்டுள்ளது.

முரண்பாடு

மாவட்ட பட்டியலில் நேற்று 247 பேருக்கு பாதிப்பு ஏற்பட்டுள்ளதாக தெரிவிக்கப்பட்டுள்ளது. ஆனால் மாநிலப் பட்டியலில் நேற்று 620 பேருக்கு பாதிப்பு ஏற்பட்டுள்ளதாக தெரிவிக்கப்பட்டுள்ளது. தொடர்ந்து இரு பட்டியல்களுக்கும் இடைய உள்ள முரண்பாடு வாடிக்கையாகி விட்டது. இந்த முரண்பாட்டை களைய வேண்டும் என சுகாதார துறைக்கு கோரிக்கை விடுக்கப்பட்டுள்ளது.