அறுவடை செய்யப்பட்ட பருத்தியை விற்க ஏற்பாடு

இது தொடர்பாக கலெக்டர் மதுசூதன்ரெட்டி, விடுத்துள்ள செய்திக்குறிப்பில் கூறியுள்ளதாவது:-
சிவகங்கை மாவட்டத்தில் பருத்தி பயிரிட்டுள்ள விவசாயிகள் தங்களின் பருத்தியை தமிழ்நாடு வேளாண் விற்பனை மற்றும் வணிகத்துறையின் கீழ் இயங்கும் மானாமதுரை மற்றும் இளையான்குடி ஒழுங்குமுறை விற்பனைக்கூடங்களின் மூலம் விற்பனை செய்யலாம். பருத்தி விற்பனை மறைமுக ஏலம் மூலம் நடைபெற இருக்கின்றது. இந்த ஏலத்தில் உள்ளூர் மற்றும் வெளியூர் வியாபாரிகள் பங்கேற்க உள்ளனர்.
விவசாயிகள் தாங்கள் கொண்டு வரும் பருத்தியினை நன்கு நிழலில் உலர வைத்து, தூசுகள் இல்லாமல் கொண்டு வந்தால் தரத்திற்கு ஏற்ப அதிகபட்ச விலை கிடைக்குமென தெரிவித்துக் கொள்ளப்படுகிறார்கள். நல்ல விலை கிடைக்கும் வரை தங்களது விளைபொருட்களை விற்பனைக்கூடத்தில் உள்ள கிட்டங்கியில் இருப்பு வைத்து விற்கவும் வழிவகை செய்யப்பட்டுள்ளது.
மேலும் தங்களின் விளைபொருட்களுக்கு குறைந்த வாடகையாக குவிண்டாலுக்கு ஒரு நாளைக்கு 10 பைசா வீதம் வாடகைக்கு அனுமதிக்கப்படுகிறது. பருத்தி ஏலம் தொடர்பாக விவசாயிகள் 9786269851, 9698472981 மற்றும் 9626860392 என்ற எண்களை தொடர்பு கொண்டு விவரம் தெரிந்து கொள்ளலாம்.
இவ்வாறு அதில் கூறப்பட்டுள்ளது..