சங்கரன்கோவில் அரசு ஆஸ்பத்திரிக்கு ஆக்சிஜன் செறிவூட்டும் கருவிகள்

சங்கரன்கோவில்:

சங்கரன்கோவில் அரசு ஆஸ்பத்திரிக்கு புதிதாக 10 ஆக்சிஜன் செறிவூட்டும் கருவிகள் வழங்கும் நிகழ்ச்சி நடந்தது. மாவட்ட கலெக்டர் டாக்டர் சமீரன் தலைமை தாங்கினார். தனுஷ்குமார் எம்.பி., எம்.எல்.ஏ.க்கள் ராஜா, சதன்திருமலைக்குமார், சுகாதாரத்துறை துணை இயக்குனர் யோகானந்த் ஆகியோர் முன்னிலை வகித்தனர். டாக்டர் செந்தில் சேகர் வரவேற்றார். இதில் சென்னையில் இருந்து கொண்டு வரப்பட்ட 10 ஆக்சிஜன் செறிவூட்டிகளை கலெக்டர், எம்.பி., எம்.எல்.ஏ.க்கள் சங்கரன்கோவில் அரசு ஆஸ்பத்திரிக்கு வழங்கினர்.  தொடர்ந்து அவர்கள் காந்திநகர் பகுதியில் நகராட்சி மற்றும் பொது சுகாதாரத்துறை சார்பில் காய்ச்சல், சளி பரிசோதனை கண்டறியும் முகாமுக்கு சென்று ஆய்வு நடத்தினர். நிகழ்ச்சியில் சங்கரன்கோவில் உதவி கலெக்டர் முருகசெல்வி, தாசில்தார் ராம்குமார், நகராட்சி பொறியாளர் முகைதீன் அப்துல் காதர், அப்பாஸ் அலி உள்பட பலர் கலந்து கொண்டனர்.

சிவகிரி அருகே தேவிப்பட்டணம் விலக்கு பாதையில் உள்ள ஸ்டெல்லா மேரிஸ் பி.எட். கல்லூரியில் தமிழ்நாடு சித்த மருத்துவம் மற்றும் ஓமியோபதி துறை சார்பில் கொரோனா சித்த மருத்துவ சிகிச்சை மையம் அமைக்கப்பட்டு உள்ளது. இதன் திறப்பு விழா நடைபெற்றது. கல்லூரி தாளாளர் ஐன்ஸ்டீன் குருபாதம் முன்னிலை வகித்தார். கல்லூரி முதல்வர் நல்லசிவன் வரவேற்று பேசினார். மாவட்ட கலெக்டர் சமீரன், தனுஷ் குமார் எம்.பி. ஆகியோர் சித்த மருத்துவ சிகிச்சை மையத்தை திறந்து வைத்தனர். இதில் சதன் திருமலைக்குமார் எம்.எல்.ஏ., இணை இயக்குனர் (நலப்பணிகள்) நெடுமாறன், துணை இயக்குனர் (சுகாதாரப்பணிகள்) யோகானந்த், மாவட்ட சித்தா அலுவலர் உஷா, மாவட்ட ஒருங்கிணைப்பாளர் (சித்தா) கலா, சங்கரன்கோவில் உதவி கலெக்டர் முருகசெல்வி, சித்தா மருத்துவர்கள் ஹரிகரன், சதீஷ் உள்பட பலர் கலந்து கொண்டனர்.