சேலம் மாவட்டத்தில் கொரோனாவுக்கு பலியானோர் எண்ணிக்கை ஆயிரத்தை தாண்டியது புதிதாக 1,290 பேருக்கு தொற்று உறுதி

சேலம்:

சேலம் மாவட்டத்தில் 23 பேர் உயிரிழப்பை தொடர்ந்து கொரோனாவுக்கு பலியானோர் எண்ணிக்கை ஆயிரத்தை தாண்டியது. மேலும் புதிதாக 1,290 பேருக்கு கொரோனா தொற்று இருந்தது உறுதி செய்யப்பட்டுள்ளது.

சேலம் மாவட்டத்தில் கடந்த 5 நாட்களுக்கு மேலாக கொரோனாவுக்கு ஆயிரத்துக்கு மேற்பட்டவர்கள் பாதிக்கப்பட்டு வருகின்றனர். நேற்று முன்தினம் கொரோனாவுக்கு 1,140 பேர் பாதிக்கப்பட்டனர். இந்த நிலையில் நேற்று ஒரே நாளில் புதிதாக 1,290 பேருக்கு கொரோனா தொற்று இருந்தது பரிசோதனையில் உறுதி செய்யப்பட்டுள்ளது.

சேலம் மாநகராட்சிக்குட்பட்ட பகுதிகளில் 523 பேர், வீரபாண்டியில் 89 பேர், சேலம் ஒன்றியத்தில் 76 பேர், சங்ககிரியில் 73 பேர், ஓமலூரில் 71 பேர், அயோத்தியாப்பட்டணத்தில் 51 பேர், எடப்பாடியில் 53 பேர், தாரமங்கலம், வாழப்பாடி ஆகிய பகுதிகளில் தலா 39 பேர், கொங்கணாபுரம், மகுடஞ்சாவடி ஆகிய பகுதிகளில் தலா 31 பேர், ஆத்தூரில் 28 பேர், கெங்கவல்லி, தலைவாசல் ஆகிய பகுதிகளில் தலா 24 பேர், காடையாம்பட்டி, பனமரத்துப்பட்டி ஆகிய பகுதிகளில் தலா 22 பேர், மேச்சேரி, நங்கவள்ளி ஆகிய பகுதிகளில் தலா 21 பேர், ஏற்காட்டில் 20 பேர், மேட்டூரில் 18 பேர், பெத்தநாயக்கன்பாளையத்தில் 11 பேர், நரசிங்கபுரத்தில் 2 பேர், கொளத்தூரில் ஒருவரும் கொரோனாவுக்கு பாதிக்கப்பட்டனர்.

கொரோனாவால் பாதிக்கப்பட்டவர்கள் அனைவரும் மாவட்டத்தில் உள்ள அரசு, தனியார் ஆஸ்பத்திரிகள் மற்றும் கொரோனா சிகிச்சை மையங்கள் ஆகியவற்றில் அனுமதிக்கப்பட்டு சிகிச்சை பெற்று வருகின்றனர். இதன் மூலம் மாவட்டத்தில் கொரோனாவால் பாதிக்கப்பட்டவர்களின் எண்ணிக்கை 68 ஆயிரத்து 66 ஆக அதிகரித்துள்ளது.

ஆஸ்பத்திரிகளில் கொரோனாவுக்கு சிகிச்சை பெற்று வந்த 703 பேர் குணமடைந்துவிட்டதால் அவர்கள் டிஸ்சார்ஜ் செய்யப்பட்டனர். தொடர்ந்து 9,248 பேருக்கு சிகிச்சை அளிக்கப்பட்டு வருகிறது. மாவட்டத்தில் 130-க்கும் மேற்பட்ட இடங்கள் கட்டுப்படுத்தப்பட்ட பகுதிகளாக அறிவிக்கப்பட்டுள்ளன. அங்கு நோய் தடுப்பு பணிகளில் சுகாதாரத்துறையினர் ஈடுபட்டு வருகின்றனர்.

சேலம் மாவட்டத்தில் கடந்த சில நாட்களுக்கு மேலாக கொரோனாவுக்கு உயிரிழப்புகள் அதிகளவு ஏற்பட்டு வருகின்றன. இந்த நிலையில் சேலத்தை சேர்ந்த பெண்கள் உள்பட 23 பேர் கொரோனாவால் பாதிக்கப்பட்டு அரசு மற்றும் தனியார் ஆஸ்பத்திரிகளில் சிகிச்சை பெற்று வந்தனர். அங்கு சிகிச்சை பலனின்றி அவர்கள் பரிதாபமாக இறந்தனர்.

இதன் மூலம் மாவட்டத்தில் கொரோனாவால் பாதிக்கப்பட்டு பலியானவர்களின் எண்ணிக்கை ஆயிரத்தை தாண்டியது. அதாவது, கொரோனாவுக்கு ஆயிரத்து 11 பேர் இறந்துள்ளனர் என்பது குறிப்பிடத்தக்கது.