திருச்சி அரியமங்கலத்தில் பரபரப்பு பா.ஜனதா நிர்வாகிக்கு அரிவாள் வெட்டு; முன்னாள் ராணுவ வீரர் கைது

பொன்மலைப்பட்டி, 

திருச்சி அரியமங்கலத்தில் பா.ஜனதா நிர்வாகியை அரிவாளால் வெட்டிய முன்னாள் ராணுவ வீரரை போலீசார் கைது செய்தனர்.

இதுகுறித்து போலீஸ்தரப்பில் கூறப்படுவதாவது:-

திருச்சி அரியமங்கலம் மலையப்ப நகரை சேர்ந்தவர் தண்டபாணி (வயது 45). இவா் பா.ஜனதா கட்சியின் செயற்குழு உறுப்பினராக உள்ளார். இவரது வீட்டின் அருகே வசித்து வருபவர் பாலமுருகன் (39). இவா் முன்னாள் ராணுவ வீரர் ஆவார். 

பாலமுருகனின் முதல் மனைவி திருமணமாகி 6 மாதத்திலேயே பிரிந்து சென்று விட்டதாக கூறப்படுகிறது. இதனால் அவர் மீண்டும் 2-வதாக ஒரு பெண்ணை திருமணம் செய்துள்ளார். அவரும் கருத்து வேறுபாடு காரணமாக பாலமுருகனை விட்டு பிரிந்து சென்றுவிட்டதாக கூறப்படுகிறது.

இரு மனைவிகளும் பிரிந்து சென்றதற்கு வீட்டின் அருகில் வசித்து வரும் தண்டபாணி தான் காரணம் என்று பாலமுருகன் கூறி வந்தார். இதனால் பாலமுருகனுக்கும், தண்டபாணிக்கும் முன்விரோதம் இருந்து வந்துள்ளது. இருவரும் அடிக்கடி தகராறில் ஈடுபட்டு வந்தனர்.  இந்தநிலையில் நேற்று காலை 6 மணியளவில் வீட்டின் முன்பு பாலமுருகனுக்கும், தண்டபாணிக்கும் இடையே வாக்குவாதம் ஏற்பட்டுள்ளது. ஒரு கட்டத்தில் இருவரும் ஒருவரை ஒருவர் தாக்கி கொண்டனர். 

அப்போது ஆத்திரமடைந்த பாலமுருகன், தண்டபாணியின் தலை மற்றும் கைகளில் அரிவாளால் வெட்டியதாக தெரிகிறது. இதில் படுகாயமடைந்த அவரை அருகில் இருந்தவர்கள் மீட்டு சிகிச்சைக்காக திருச்சி அரசு ஆஸ்பத்திாிக்கு அனுப்பிவைத்தனர். அங்கு அவருக்கு தீவிர சிகிச்சை அளிக்கப்பட்டு வருகிறது.

மேலும் இதுகுறித்த புகாரின் பேரில் அரியமங்கலம் போலீசார் வழக்குப்பதிவு செய்து முன்னாள் ராணுவ வீரர் பாலமுருகனை கைது செய்து விசாரணை நடத்தி வருகின்றனர். இந்த சம்பவத்தால் அப்பகுதியில் பெரும் பரபரப்பு ஏற்பட்டது.