<
பல்லடத்தில் கொரோனா ஊரடங்கால் ரூ.600 கோடி காடா துணிகள் தேக்கம்
பல்லடத்தில் கொரோனா ஊரடங்கால் ரூ.600 கோடி காடா துணிகள் தேக்கம்
பல்லடம்
பல்லடத்தில் கொரோனா ஊரடங்கால் ரூ.600 கோடி காடா துணிகள் தேக்கம் அடைந்துள்ளது. விசைத்தறிகள் இயங்காததால் 4 லட்சம் பேர் வேலை இழந்துள்ளனர்.
காடா துணிகள் தேக்கம்
திருப்பூர், கோவை மாவட்டங்களில் 2 லட்சம் விசைத்தறிகள், 20 ஆயிரம் நாடா இல்லா விசைத்தறிகள் இயங்கி வருகின்றன. இவற்றின் மூலம் தினசரி ரூ.100 கோடி மதிப்புள்ள 2 கோடி மீட்டர் காடா ஜவுளி துணி உற்பத்தி செய்யப்படுகிறது. இந்த காடா ஜவுளித் தொழிலில் நேரடியாக 1 லட்சம் பேரும், மறைமுகமாக 4 லட்சம் பேரும் வேலை வாய்ப்பு பெறுகின்றனர்.
இந்த நிலையில் கடந்த ஆண்டு கொரோனா ஊரடங்கு நடவடிக்கையால் பாதிக்கப்பட்ட விசைத்தறிதொழில் மெல்ல இயல்பு நிலைக்கு வரத்தொடங்கியது. இந்த நிலையில் தற்போது கொரோனா தொற்று 2-வது அலையினால், அறிவிக்கப்பட்ட ஊரடங்கால் விசைத்தறிகளை இயக்க முடியாமலும், உற்பத்தி செய்த துணிகளை அனுப்ப முடியாத நிலையும் ஏற்பட்டுள்ளது. இதனால் ரூ.600 கோடி மதிப்பிலான காடா துணிகள் தேக்கம் அடைந்துள்ளது. உற்பத்தி செய்து அனுப்பிய துணிகளுக்கு வடமாநில வியாபாரிகளிடமிருந்து சுமார் ரூ.1500 கோடி பாக்கித் தொகை வசூல் ஆகாதநிலையும் உள்ளது. இதனால் காடா ஜவுளி உற்பத்தியாளர்கள் கடும் பாதிப்படைந்து உள்ளனர்.
உரிய விலை கிடைக்கவில்லை
இதுகுறித்து பல்லடம் ஜவுளி உற்பத்தியாளர்கள் சங்க ஒருங்கிணைப்பாளர் சக்திவேல் கூறியதாவது:-
திருப்பூர், கோவை மாவட்டங்களில் முக்கிய தொழிலாக உள்ள விசைத்தறி ஜவுளித்தொழில் ஏற்கனவே ஆட்கள் பற்றாக்குறை, உற்பத்தி செய்த ஜவுளித்துணிக்கு உரிய விலை கிடைக்காதது போன்ற காரணங்களால் நெருக்கடியை சந்தித்து வந்தது. இதனிடையே கடந்த ஆண்டு கொரோனா ஊரடங்கால் முற்றிலும் முடங்கியது. இந்த நிலையில் மத்திய, மாநில அரசுகளின் தளர்வுகள் அறிவிப்பால் சற்றே விசைத்தறி தொழில் சூடு பிடித்து இயங்கிய வேளையில் கொரோனாவின் 2-வது அலை கடும் பாதிப்பை ஏற்படுத்தி உள்ளது.
இதனால், தமிழகத்தில் இருந்து ஜவுளிகள் அதிகமாக ஏற்றுமதியாகும் குஜராத், மராட்டியம் போன்ற மாநிலங்களில் அறிவிக்கப்பட்ட ஊரடங்கால் வடமாநில ஜவுளி வியாபாரிகள், ஏற்கனவே ஆர்டர் கொடுத்து தயார் நிலையில் உள்ள காடா துணிகளை அனுப்ப வேண்டாம் என்று கூறிவிட்டனர். மேலும் புதிய ஆர்டர்களை நிறுத்தி வைத்துள்ளனர். ஏற்கனவே ஆர்டர் கொடுத்து பெற்ற துணிகளுக்கும் இதுவரை பணம் அனுப்பாமலும் உள்ளனர்.
80 சதவீத தொழில்கள் முடக்கம்
இதனால் கடும் பொருளாதார நெருக்கடிக்கு, ஜவுளி உற்பத்தியாளர்கள், தள்ளப்பட்டுள்ளோம். தற்போது கொரோனா ஊரடங்கால் 80 சதவீத தொழில்கள் முடங்கி விட்டது. ஏற்றுமதி சம்பந்தப்பட்ட 20 சதவீத உற்பத்தியாளர்கள் மட்டுமே தற்போது விசைத்தறிகளை இயக்கி வருகின்றனர். இதனால் சுமார் ரூ.600 கோடி காடா துணிகள் தேக்கமடைந்துள்ளது. விசைத்தறிகள் இயங்காததால் இந்தத் தொழிலில் நேரடியாகவும், மறைமுகமாகவும் உள்ள சுமார் 4 லட்சம் தொழிலாளர்கள் வேலை இழந்துள்ளனர்.
எனவே மத்திய, மாநில அரசுகள் ஜவுளித்தொழில் சீராகும் வரை கழிவுப்பஞ்சு ஏற்றுமதிக்கு அரசு தடை விதிக்க வேண்டும், நூல் விலையை கட்டுப்படுத்த வேண்டும். ஜவுளி உற்பத்தியாளர்கள் பெற்றுள்ள கடன்களுக்கு தவணை செலுத்த கால அவகாசம் அளிக்க வேண்டும். 3 மாத கால வட்டி தொகையை தள்ளுபடி செய்ய வேண்டும்.
சிறப்பு ரெயில்-தடுப்பூசி
மேலும் வட மாநிலத்தொழிலாளர்கள் சொந்த ஊருக்கு சென்றுவிட்டனர். அவர்கள் திரும்பி வந்த பின்புதான் இந்த ஜவுளித்தொழில் இயல்பு நிலைக்கு திரும்பும். அவர்களை அழைத்துவர அரசு "சிறப்பு ரெயில்" இயக்க அனுமதித்தால் கட்டணம் செலுத்தி அவர்களை அழைத்து வர தயாராக உள்ளோம்.
மேலும் கொரோனா தடுப்பூசி தட்டுப்பாடு உள்ளதால் ஏராளமான தொழிலாளர்கள் தடுப்பூசி போடவில்லை. இதனால் பலர் வேலைக்கு வர தயங்குகின்றனர். அரசு சலுகை விலையில் தடுப்பூசி கொடுத்தால் விலை கொடுத்து வாங்கி தொழிலாளர்களுக்கு செலுத்த தயாராக உள்ளோம். எனவே மத்திய, மாநில அரசுகள் கொரோனா ஊரடங்கால் மிகவும் பாதிக்கப்பட்டுள்ள விசைத்தறி ஜவுளி தொழிலை சலுகைகள் அளித்து காப்பாற்ற வேண்டும்.
இவ்வாறு அவர் தெரிவித்தார்
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire