அ.தி.மு.க.வை கைப்பற்ற வேண்டும் என்ற சசிகலாவின் கனவு ஒருபோதும் நனவாகாது

விழுப்புரம், 

விழுப்புரம் மாவட்ட அ.தி.மு.க. நிர்வாகிகள் ஆலோசனை கூட்டம் நேற்று காலை விழுப்புரத்தில் உள்ள மாவட்ட அ.தி.மு.க. அலுவலகத்தில் நடைபெற்றது. கூட்டத்திற்கு மாவட்ட அவைத்தலைவர் கண்ணன் தலைமை தாங்கினார். எம்.எல்.ஏ.க்கள் சக்கரபாணி, அர்ஜூணன், முன்னாள் எம்.எல்.ஏ. முத்தமிழ்செல்வன் ஆகியோர் முன்னிலை வகித்தனர். கூட்டத்தில் மாவட்ட செயலாளரும் முன்னாள் அமைச்சருமான சி.வி.சண்முகம் கலந்துகொண்டு சிறப்புரையாற்றினார். அப்போது அவர் கூறியதாவது:-

1½ கோடி தொண்டர்களின் ஆதரவுடன் அ.தி.மு.க. சிறப்பாக செயல்பட்டு கொண்டிருக்கிறது. தனிப்பட்ட குடும்பத்திற்கு எந்தவித சம்பந்தமும் இல்லை. இந்த இயக்கம் தொண்டர்களுக்கான இயக்கம். ஆடின கையும், பாடிய வாயும் சும்மா இருக்காது என்பதைப்போல மீண்டும் அ.தி.மு.க.வை கைப்பற்றி கொள்ளை அடிக்கலாம் என சசிகலா திட்டம்போடுகிறார். அ.தி.மு.க.வில் அடிப்படை உறுப்பினர் பதவி கூட இல்லாத சசிகலாவிற்கும், அவரது குடும்பத்தினருக்கும் அ.தி.மு.க.வில் இனி எப்போதுமே இடமில்லை. 

இந்த இயக்கத்தை எப்படியாவது அபகரித்து கொள்ளையடிக்கும் நோக்கத்துடன் சசிகலா யார், யாருக்கோ தொலைபேசியில் பேசி நாடகம் ஆடி வருகிறார். அ.தி.மு.க.வுக்கும் சசிகலாவுக்கும் எந்தவித சம்பந்தமும் இல்லை என்று உச்சநீதிமன்றம் வரை சென்று தெள்ளத்தெளிவாக தெரியப்படுத்தப்பட்டுள்ளது. எப்படியாவது அ.தி.மு.க.வை கைப்பற்றி விட வேண்டும் என்று சசிகலா கனவு காண்கிறார். அவரது கனவு ஒருபோதும் நனவாகாது.

சசிகலா குடும்பம் அடித்த கொள்ளையால்தான் வீண் பழியை ஏற்றுக்கொண்டு முன்னாள் முதல்-அமைச்சர் ஜெயலலிதா சிறைக்கு சென்றார். ஜெயலலிதாவின் சாபம்தான், சசிகலா சிறைக்கு சென்று 4 வருடம் கழி சாப்பிட்டார். ஊழல் வழக்கில் சிறை தண்டனை பெற்றதோடு அ.தி.மு.க.வில் அடிப்படை உறுப்பினர் பதவிக்கு கூட தகுதியில்லாத சசிகலாவிற்கு அ.தி.மு.க.வை பற்றி பேசுவதற்கு எந்த தகுதியும், தார்மீக உரிமையும் கிடையாது.

இன்றைக்கு நமக்கு எதிரி தி.மு.க. மட்டுமல்ல, இந்த இயக்கத்திற்கு துரோகம் விளைவிக்க நினைக்கும் துரோகிகளை இனம் கண்டுகொண்டு இயக்கத்தை ஜாக்கிரதையாக நடத்த வேண்டும். சசிகலா குடும்பத்தை நாம் எந்த காலத்திலும் நெருங்க விடக்கூடாது. மன்னார்குடி குடும்பத்தை அ.தி.மு.க.வில் நுழைய விடக்கூடாது. தலைமை கழகத்தினால் நிறைவேற்றப்பட்ட தீர்மானத்தை விழுப்புரம் மாவட்ட அ.தி.மு.க. ஏற்றுக்கொண்டு வரவேற்கிறது.

இவ்வாறு அவர் கூறினார்.