சேலத்தில் சிறுமியை கடத்திய தொழிலாளி ‘போக்சோ' சட்டத்தில் கைது

சேலம்:

சேலம் பொன்னம்மாபேட்டை அருகே உள்ள சுக்கம்பட்டி பகுதியை சேர்ந்தவர் வெங்கடாசலம். இவருடைய மகன் விக்னேஸ்வரன் (வயது 28), மரம் வெட்டும் தொழிலாளி. இவர் கடந்த ஆண்டு டிசம்பர் மாதம் 16 வயதுடைய சிறுமியிடம் ஆசை வார்த்தை கூறி அவரை கடத்தி சென்று விட்டதாக கூறப்படுகிறது. இதுகுறித்து சிறுமியின் பெற்றோர் பொன்னம்மாபேட்டை அனைத்து மகளிர் போலீஸ் நிலையத்தில் புகார் கொடுத்தனர்.

அதன்பேரில் போலீசார் வழக்குப்பதிவு செய்து சிறுமியை மீட்டனர். இந்த நிலையில் விக்னேஸ்வரன் தலைமறைவாகினர். பின்னர் அவரை போலீசார் தேடிவந்தனர். இந்த நிலையில் நேற்று சுக்கம்பட்டி பகுதியில் இருந்த விக்னேஸ்வரனை போலீசார் பிடித்து அவரை ‘போக்சோ' சட்டத்தில் கைது செய்தனர்.