‘தினமும் யோகா செய்தால் உடல், மனம் ஆரோக்கியமாக இருக்கும்’-கலெக்டர் மதுசூதன்ரெட்டி பேச்சு

சர்வதேச யோகா தினத்தையொட்டி சிவகங்கை அருகே உள்ள காஞ்சிரங்கால் பகுதியில் தேசிய ஊரக வேலை உறுதி திட்டத்தின் கீழ் பணிபுரியும் பணியாளர்களுக்கான யோகா நிகழ்ச்சி நடைபெற்றது. இதில் சிவகங்கை மாவட்ட கலெக்டர் மதுசூதன்ரெட்டி கலந்துகொண்டு யோகாசனம் செய்தார்.பின்னர் அவர் கூறியதாவது:-
 இதில் குறிப்பாக பெண்களுக்கு அதிகளவில் வேலைப்பளு இருக்கும் நிலையில் அவர்கள் இதில் ஈடுபட்டால் அவர்களின் உடல்நிலையும், மனநிலையும் நன்றாக இருக்கும். எனவே வீட்டில் உள்ள ஒவ்வொரு பெண்களும் தினந்தோறும் அதிகாலையில் 20 நிமிடங்கள் யோகாவிற்கு நேரம் ஒதுக்கி இதில் ஈடுபட வேண்டும்.
தினந்தோறும் யோகா பயிற்சியில் ஈடுபடும் போது உடல் வலிமை ஏற்பட்டு எவ்வித நோயும் இல்லாமல் பாதுகாக்கலாம்.
இதேபோல் அரசு பணிகளில் ஈடுபடும் ஊழியர்களும் தினந்தோறும் யோகா பயிற்சியில் ஈடுபட்டால் அவர்களின் வேலைப்பளு மற்றும் மன அழுத்தம் குறைந்து ஆரோக்கியமான வாழ்வை பெறலாம்.
இவ்வாறு அவர் கூறினார்.
இந்த நிகழ்ச்சியில் யோகா மருத்துவ அலுவலர் டாக்டர் தங்கம், தேசிய ஊரக வேலை உறுதி திட்ட அலுவலர் செல்வராஜ், வட்டார வளர்ச்சி அலுவலர்கள் திருப்பதிராஜன், பழனியம்மாள், உமாமகேஸ்வரி, காஞ்சிரங்கால் ஊராட்சி மன்ற தலைவர் மணிமுத்து, ஊராட்சி ஒன்றிய நடுநிலைப்பள்ளி தலைமையாசிரியர் தனராணி, ஊரக வளர்ச்சித்துறை உதவி செயற்பொறியாளர் ராஜா, யோகா பயிற்சி ஆசிரியர் பரமசிவம் மற்றும் அரசு அலுவலர்கள் கலந்துகொண்டனர்.