கொல்லிமலை வனப்பகுதியில் வன விலங்குகளை வேட்டையாட முயன்ற 3 பேர் சிக்கினர்-2 நாட்டுத்துப்பாக்கிகள் பறிமுதல்

சேந்தமங்கலம்:

கொல்லிமலையில் சிலர் அனுமதியின்றி நாட்டுத்துப்பாக்கிகள் வைத்திருப்பதாவும், வனப்பகுதிக்குள் புகுந்து, விலங்குகளை வேட்டையாடி வருவதாகவும் வாழவந்திநாடு போலீசாருக்கு புகார்கள் சென்றன. அதன்பேரில் போலீஸ் இன்ஸ்பெக்டர் சதீஷ்குமார் தலமையிலான போலீசார் குண்டூர்நாடு ஊராட்சிக்குட்பட்ட பகுதிகளில் ரோந்து பணியில் ஈடுபட்டனர். அப்போது சுண்டக்காடு வனப்பகுதியில் இருந்து 3 பேர் கையில் நாட்டுத்துப்பாக்கியுடன் மோட்டார் சைக்கிள்களில் வெளியே வந்தனர். 

அவர்கள் போலீசாரை கண்டதும் அங்கிருந்து தப்பி ஓடினர். ஆனால் போலீசார் அவர்களை மடக்கி பிடித்து விசாரித்தனர். விசாரணையில் அவர்கள் அதே பகுதியை சேர்ந்த பொன்னுசாமி மகன் சந்திரசேகர் (வயது 23), சின்னசாமி மகன் ஸ்ரீ (22), துரைசாமி மகன் கண்ணதாசன் (20) என்பதும், வன விலங்குகளை வேட்டையாட முயன்றதும் தெரியவந்தது. இதையடுத்து போலீசார் வழக்குப்பதிவு செய்து அவர்கள் 3 பேரையும் கைது செய்தனர். மேலும், அவர்களிடம் இருந்து 2 நாட்டுத்துப்பாக்கிகள், 2 மோட்டார் சைக்கிள்கள் பறிமுதல் செய்யப்பட்டன.