சென்னையில் கொரோனா பாதுகாப்பு வழிமுறைகளை பின்பற்றாத 4 திருமண மண்டபங்களுக்கு அபராதம்

சென்னை,

கொரோனா வைரஸ் தொற்றை தடுப்பதற்காக ஊரடங்கு உத்தரவு பல்வேறு தளர்வுகளுடன் அமலில் இருந்து வருகிறது. இதில் திருமணம் போன்ற சுப நிகழ்ச்சிகளில் 50 நபர்கள் மட்டும் கலந்துகொள்ளும் வகையில் ஊரடங்கு உத்தரவில் தளர்வு அளிக்கப்பட்டுள்ளது.

பெருநகர சென்னை மாநகராட்சிக்குட்பட்ட பகுதிகளில் உள்ள ஓட்டல்கள், கல்யாண மண்டபங்கள், விருந்து அரங்கங்கள், சமூகநலக்கூடங்கள் ஆகியவற்றில் பதிவு செய்யப்படும் திருமணம் போன்ற சுபநிகழ்ச்சிகள் குறித்த விவரங்களை மாநகராட்சிக்கு இணையதளத்தின் வாயிலாக தெரியப்படுத்த மண்டப உரிமையாளர்களுக்கு ஏற்கனவே அறிவுறுத்தப்பட்டது.

அதன்படி, இதுநாள்வரை 340 உரிமையாளர்களிடமிருந்து சுபநிகழ்ச்சிக்கு பதிவுசெய்யப்பட்ட விவரங்கள் பெறப்பட்டுள்ளன. இந்த பதிவுகளின் அடிப்படையில் மாநகராட்சி வருவாய்த்துறை அலுவலர்கள் மேற்கொண்ட திடீர் ஆய்வில், அரசின் பாதுகாப்பு வழிமுறைகளை பின்பற்றாத 4 திருமண மண்டபங்கள் மற்றும் சுபநிகழ்ச்சியில் முக கவசம் அணியாத நபர்கள் என மொத்தம் ரூ.10 ஆயிரத்து 520 அபராதம் விதிக்கப்பட்டுள்ளது.

எனவே, திருமணம் போன்ற சுப நிகழ்ச்சிகளில் கலந்துகொள்ளும் நபர்கள் கட்டாயம் அரசின் பாதுகாப்பு வழிமுறைகளான முக கவசம் அணிதல், சமூகஇடைவெளியை கடைப்பிடித்தல் ஆகியவற்றை முறையாக கடைப்பிடிக்கவேண்டும்.

மேற்கண்ட தகவல் பெருநகர சென்னை மாநகராட்சி கமிஷனர் ககன்தீப்சிங் பேடி வெளியிட்டுள்ள செய்திக்குறிப்பில் தெரிவிக்கப்பட்டுள்ளது.