கைதி கொலை: சப்-இன்ஸ்பெக்டரிடம் சி.பி.சி.ஐ.டி. விசாரணை

நெல்லை:

நெல்லை மாவட்டம் மூன்றடைப்பு அருகே உள்ள வாகைகுளத்தை சேர்ந்தவர் பாவநாசம் மகன் முத்து மனோ (வயது 27). இவர் பிளஸ்-2 மாணவரை கொலை செய்ய முயன்ற வழக்கில், களக்காடு போலீசாரால் கைது செய்யப்பட்டு ஸ்ரீவைகுண்டம் சிறையில் அடைக்கப்பட்டார்.

பின்னர் கடந்த ஏப்ரல் மாதம் 22-ந் தேதி பாளையங்கோட்டை மத்திய சிறைக்கு மாற்றப்பட்டார். அப்போது முத்து மனோ கொலை செய்யப்பட்டார். இதுகுறித்து பெருமாள்புரம் போலீசார் விசாரணை நடத்தி, கைதி ஜேக்கப் உள்ளிட்ட 7 பேர் மீது வழக்குப்பதிவு செய்து அவர்களை கைது செய்தனர்.

இதனைத்தொடர்ந்து இந்த கொலை வழக்கு நெல்லை சி.பி.சி.ஐ.டி. போலீசாருக்கு மாற்றப்பட்டது. போலீசார் இதுகுறித்து தொடர்ந்து விசாரணை நடத்தி வருகின்றனர்.

இந்த நிலையில், முத்து மனோவை ஸ்ரீவைகுண்டம் சிறையிலிருந்து நாங்குநேரி கோர்ட்டுக்கு அழைத்து சென்று அங்கிருந்து பாளையங்கோட்டை சிறைக்கு கொண்டு வந்த போலீஸ் சப்-இன்ஸ்பெக்டர் மற்றும் போலீஸ்காரர் ஆகிய 2 பேரிடம் நேற்று விசாரணை நடத்தினர். துணை போலீஸ் சூப்பிரண்டு அனில்குமார் தலைமையில் இன்ஸ்பெக்டர்கள் பிறைச்சந்திரன், உலக ராணி, சப்-இன்ஸ்பெக்டர் பார்வதி ஆகியோர் விசாரணையை மேற்கொண்டனர்.