சிறந்த விளையாட்டு வீரர்கள் முதல் அமைச்சரின் மாநில விருது பெற விண்ணப்பிக்கலாம்

கள்ளக்குறிச்சி

கள்ளக்குறிச்சி மாவட்ட கலெக்டர் ஸ்ரீதர் வெளியிட்டுள்ள செய்திக்குறிப்பில் கூறியிருப்பதாவது:-

சாதனை வீரர்கள்

தமிழகத்தில் ஆண்டுதோறும் பன்னாட்டு அளவிலும், தேசிய அளவிலும் பதக்கங்கள் பெற்று சிறந்து விளங்கும் விளையாட்டு வீரர்கள் 2 பேர், வீராங்கனைகள் 2 பேர், சிறந்த பயிற்றுநர்கள் 2 பேர், சிறந்த உடற்கல்வி இயக்குனர்கள் மற்றும் உடற்கல்வி ஆசிரியர்கள் 2 பேருக்கு முதல்-அமைச்சரின் மாநில விளையாட்டு விருது பரிசாக தலா ரூ.1 லட்சமும், ரூ.10 ஆயிரம் மதிப்பிலான தங்க பதக்கம் மற்றும் பாராட்டுப் பத்திரம் ஆகியவற்றை இளைஞர் நலன் மற்றும் விளையாட்டு மேம்பாட்டுத்துறை ஒவ்வொரு ஆண்டும் வழங்கி வருகிறது.

எனவே கள்ளக்குறிச்சி மாவட்டத்தை சேர்ந்த விளையாட்டு வீரர், வீராங்கனைகள் முதல்-அமைச்சரின் மாநில விருது பெறுவதற்கு முந்தைய 3 ஆண்டுகள் விளையாட்டில் சாதனை படைத்த விவரங்களை சமர்ப்பிக்க வேண்டும். மேலும் தங்களது சான்றிதழ்களின் நகல்களை சான்றொப்பத்துடன் இணைக்க வேண்டும். 

விண்ணப்பபடிவம்

விண்ணப்ப படிவம் மற்றும் விதிமுறைகளை www.sdat.tn.gov.in என்ற இணயதளத்தில் எடுத்துக்கொள்ள வேண்டும். விண்ணப்பங்களை முதன்மைச் செயலாளர், உறுப்பினர் செயலர், தமிழ்நாடு விளையாட்டு மேம்பாட்டு ஆணையம், சென்னை, என்ற முகவரிக்கு அனுப்ப வேண்டும். விண்ணப்பங்கள் அடங்கிய உறையின் மேல் முதல்-அமைச்சர் மாநில விளையாட்டு விருதுக்கான விண்ணப்பம் என்று எழுதப்பட்டிருக்க வேண்டும். 

பூர்த்தி செய்யப்பட்ட விண்ணப்பங்களை அடுத்த மாதம் ஜூலை 15-ந் தேதிக்குள் தமிழ்நாடு விளையாட்டு மேம்பாட்டு ஆணையம், ஜவகர்லால் நேரு விளையாட்டு அரங்கம், பெரியமேடு, சென்னை-600003 என்ற முகவரிக்கு அனுப்ப வேண்டும். 

 கூடுதல் விவரங்களை அறிய

மேலும் இந்த விருதுபற்றிய விவரங்களை மாவட்ட விளையாட்டு அலுவலக முகவரியில் அலுவலக வேலை நாட்களில் நேரிலோ அல்லது 7401703485 என்ற தொலைபேசியிலோ தொடர்பு கொள்ளலாம்.

மேலும் கூடுதல் விவரங்களை சென்னை தலைமை அலுவலகம் 044-28364322 என்ற தொலைபேசி எண்ணில் தொடர்பு கொண்டு அறிந்து கொள்ளலாம்.

 இவ்வாறு அந்த செய்திக்குறிப்பில் கூறப்பட்டுள்ளது.