<
கிருஷ்ணகிரியில் பயங்கரம்: குடிபோதையில் மகன் குத்திக்கொலை-பூ வியாபாரி வெறிச்செயல்
கிருஷ்ணகிரியில் குடிபோதையில் மகனை கத்தியால் குத்திக்கொலை செய்த பூ வியாபாரியை போலீசார் கைது செய்தனர்.
கிருஷ்ணகிரி:
மட்டன் கடை தொழிலாளி
கிருஷ்ணகிரி பழையபேட்டை நேதாஜி சாலை மில்லத்நகரை சேர்ந்தவர் நிசார் அகமது (வயது 55). பூ வியாபாரி. இவருடைய மகன் பைரோஸ் அகமது (23). இவர் மட்டன் கடை ஒன்றில் தொழிலாளியாக வேலை செய்து வந்தார். இவருக்கு திருமணம் ஆகி பாத்திமா என்கிற பாமுஷா (22) என்ற மனைவியும், 3 வயதில் குழந்தையும் உள்ளது.
நிசார் அகமதுவும், அவரது மகன் பைரோஸ் அகமதுவும் அடுத்தடுத்த வீடுகளில் வசித்து வந்தனர். இவர்களுக்குள் அடிக்கடி குடும்ப தகராறு ஏற்படுவது வழக்கம். மேலும் நிசார் அகமதுவிற்கு மது குடிக்கும் பழக்கமும் இருந்து வந்தது.
குத்திக்கொலை
இந்த நிலையில், நிசார் அகமது நேற்று முன்தினம் இரவு மது போதையில் இருந்தார். அப்போது தந்தை-மகன் இடையே மீண்டும் தகராறு ஏற்பட்டது. அந்த நேரம் நிசார் அகமது திடீரென்று தான் வைத்திருந்த கத்தியால், பைரோஸ் அகமதுவின் வயிற்றில் குத்தினார்.
இதில் பைரோஸ் அகமது பலத்த காயம் அடைந்தார். அவரது அலறல் சத்தம் கேட்டு அக்கம் பக்கத்தில் இருந்தவர்கள் அங்கு ஓடி வந்தனர். அவர்கள் பைரோஸ் அகமதுவை மீட்டு சிகிச்சைக்காக கிருஷ்ணகிரி அரசு ஆஸ்பத்திரியில் சேர்த்தனர். அங்கு தீவிர சிகிச்சை அளித்தும் பலனின்றி அவர் பரிதாபமாக இறந்தார்.
பூ வியாபாரி கைது
இந்த கொலை குறித்து தகவல் அறிந்ததும் கிருஷ்ணகிரி டவுன் போலீசார் சம்பவ இடத்திற்கு சென்று விசாரணை நடத்தினார்கள். மேலும் கொலையுண்ட பைரோஸ் அகமதுவின் உடலை மீட்டு பிரேத பரிசோதனைக்காக அனுப்பி வைத்தனர். இந்த கொலை தொடர்பாக கிருஷ்ணகிரி டவுன் போலீசார் வழக்குப்பதிவு செய்து பூ வியாபாரி நிசார் அகமதுவை கைது செய்தனர்.
கிருஷ்ணகிரியில் குடிபோதையில் பெற்ற மகனை, தந்தையே கத்தியால் குத்திக்கொலை செய்த சம்பவம் பரபரப்பை ஏற்படுத்தி உள்ளது.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
