மானாமதுரையில், மர்ம நோய் தாக்கிய ஆடுகளை கால்நடைத்துறையினர் நேரில் ஆய்வு

மானாமதுரை அருகே சின்னகண்ணூர் ஊராட்சிக்கு உட்பட்ட புலிக்குளம் கிராமத்தில் மர்ம நோய் தாக்கியதில் 40-க்கும் மேற்பட்ட ஆடுகள் இறந்தன. இது குறித்து ‘தினத்தந்தி‘யில் நேற்று முன்தினம் செய்தி வெளியிடப்பட்டது.
பின்னர் இது தொடர்பாக கால்நடைத்துறை இணை இயக்குனர் சஞ்சீவி கூறியதாவது:-
நோய் தாக்கிய உடன் கிராம மக்கள் தாங்களாகவே கால்நடை மருந்தகத்தை அணுகி மருந்துகள் வாங்கி ஆட்டிற்கு செலுத்தி உள்ளனர். இதனால் தான் ஆடுகள் இறப்பு அதிகரித்து உள்ளது. சளி அதிகமாகி மூக்கில் இருந்து வடிந்து ஆடுகள் சுவாசிக்க முடியாமல் இறந்து போய் உள்ளன. முதலிலேயே கால்நடைத்துறையினரிடம் தெரிவித்து இருந்தால் மற்ற ஆடுகளை நோய் தாக்குதலுக்கு முன் காப்பாற்றி இருக்கலாம். இருப்பினும் கிராம மக்களிடம் நோய் தாக்குதல் எதுவும் ஏற்பட்டால் உடனே கால்நடைத்துறையை அணுகுமாறு அறிவுறுத்தி உள்ளோம்.
இவ்வாறு அவர் கூறினார்.
இந்த ஆய்வில் மானாமதுரை யூனியன் சேர்மன் லதா அண்ணாத்துரை, ஒன்றிய கவுன்சிலர் அண்ணாத்துரை, ஊராட்சி தலைவர் அங்குச்சாமி ஆகியோர் உடன் இருந்தனர்.