கார் மோதி விவசாயி பலி

மானூர்:

மானூர் அருகே உள்ள கீழப்பிள்ளையார்குளத்தைச் சேர்ந்தவர் சிவராமன் (வயது 65). விவசாயியான இவர் கடந்த 7-ந் தேதி தனது மொபட்டில் மானூர் வந்துவிட்டு ஊருக்கு திரும்பினார்.

நெல்லை - சங்கரன்கோவில் மெயின் ரோட்டில் இருந்து பிள்ளையார்குளம் விலக்கில் திரும்பியபோது, பின்னால் களக்காடு அருகே உள்ள கீழக்கருவேலங்குளத்தை சேர்ந்த இசக்கிமுத்து (42) என்பவர் ஓட்டி வந்த கார், எதிர்பாராமல் மோதியது. இதில் தூக்கி வீசப்பட்ட சிவராமன் பலத்த காயம் அடைந்தார். அருகில் உள்ளவர்கள் அவரை மீட்டு சிகிச்சைக்காக பாளையங்கோட்டை அரசு ஆஸ்பத்திரியில் சேர்த்தனர். அங்கு சிகிச்சை பலனின்றி சிவராமன் பரிதாபமாக இறந்தார்.

இதுகுறித்து மானூர் போலீசார் வழக்குப்பதிவு செய்து விசாரணை நடத்தி வருகிறார்கள்.