<
தூத்துக்குடி அருகே நடுக்கடலில் தத்தளித்த 7 மீனவர்கள் மீட்பு
தூத்துக்குடி அருகே நடுக்கடலில் தத்தளித்த 7 மீனவர்களை கடலோர காவல் படையினர் மீட்டனர்.
தூத்துக்குடி:
தூத்துக்குடி அருகே விைசப்படகில் என்ஜின் பழுதானதால் நடுக்கடலில் தத்தளித்த 7 மீனவர்களை கடலோர காவல்படையினர் பத்திரமாக மீட்டு கரைக்கு கொண்டு வந்தனர்.
படகு பழுது
தூத்துக்குடி அருகே உள்ள தருவைகுளத்தை சேர்ந்த 7 மீனவர்கள் எட்வின் என்ற விசைப்படகில் கடலுக்குள் மீன்பிடிக்க சென்றனர். அவர்கள் தூத்துக்குடியில் இருந்து சுமார் 55 கடல் மைல் தொலைவில் மீன்பிடித்துக் கொண்டிருந்தனர்.
அப்போது எதிர்பாராதவிதமாக படகின் என்ஜினில் திடீர் பழுது ஏற்பட்டது. இதனால் படகை அவர்களால் தொடர்ந்து செலுத்த முடியவில்லை. இதன் காரணமாக மீனவர்கள் நடுக்கடலில் தத்தளித்துக் கொண்டு இருந்தனர்.
கடலோர காவல்படை
இதுகுறித்து தகவல் அறிந்த தூத்துக்குடி கடலோர காவல்படையினர், கடலோர காவல்படை ரோந்து கப்பல் அபிராஜ் மூலம் மீனவர்களை தேடும் பணியில் ஈடுபட்டனர். தொடர்ந்து நடுக்கடலில் தத்தளித்துக் கொண்டு இருந்த மீனவர்களை கண்டுபிடித்தனர்.
பின்னர் அந்த படகில் ஏற்பட்டு இருந்த என்ஜின் பழுதை கடலோர காவல்படையினர் சரி செய்ய முயன்றனர். ஆனால், டீசல் டேங்கில் தண்ணீர் புகுந்ததால் என்ஜினை இயக்க முடியவில்லை.
பத்திரமாக மீட்பு
மேலும், பலத்த காற்று காரணமாக படகில் இருந்த 3 மீனவர்கள் லேசான காயம் அடைந்து இருந்தனர். அவர்களுக்கு உரிய முதலுதவி அளிக்கப்பட்டது.
இதையடுத்து அந்த பகுதியில் வந்த மற்றொரு படகு மூலம் பழுதடைந்த படகை கட்டி கரைக்கு இழுத்து வந்தனர். அந்த படகுகளுக்கு பாதுகாப்பாக ரோந்து கப்பல் அபிராஜ் உடன் வந்தது. 7 மீனவர்களும் பத்திரமாக கரைக்கு அழைத்து வரப்பட்டனர்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
