விதை சட்டங்களை மீறினால் கடும் நடவடிக்கை-விற்பனையாளர்களுக்கு அதிகாரி எச்சரிக்கை

இது குறித்து சிவகங்கை, ராமநாதபுரம் மாவட்டங்களில் விதை ஆய்வு துணை இயக்குனர் துரை கண்ணம்மாள் வெளியிட்டுள்ள செய்திக்குறிப்பில் கூறி இருப்பதாவது:-
மாவட்ட விதை விற்பனையாளர்கள் தங்களது கடையில் கண்டிப்பாக விதை இருப்பு விவர பலகை மற்றும் விலை விவரப்பட்டியல் ஆகியவற்றை விவசாயிகள் பார்வையில் படும்படி வைத்து பராமரிக்க வேண்டும். மொத்த விற்பனையாளர்களிடமிருந்து விதைகள் வாங்கும்போது, அதற்கு உரிய படிவம் -2 ஐ பெற வேண்டும்.
வெளி மாநில மற்றும் தனியார் விதை உற்பத்தி நிறுவனங்களால் ஆராய்ச்சிகள் மூலம் புதிதாக உருவாக்கப்பட்டு விற்பனைக்கு கொண்டு வரப்படும். பயிர் ரகங்கள் கண்டிப்பாக கோவை விதைச்சான்று இயக்குனர் அலுவலகத்தில் பதிவு செய்யப்பட்டு, அதன் பிறகு விற்க வேண்டும். விதை விற்பனையாளர்கள் பதிவுச்சான்றை சரி பார்த்து அதன் பிறகே தனியார் பயிர் ரக விதைகளை விற்கலாம்.
 விவசாயிகளுக்கு விதை விற்பனை செய்யும் போது சம்பந்தப்பட்ட பயிர் ரகத்தின் குவியல் எண் மற்றும் காலாவதி நாள் ஆகியவற்றை குறிப்பிட்டு, விலைப்பட்டியல் உடனுக்குடன் வழங்க வேண்டும்.
இந்த அறிவுரைகளை பின்பற்ற தவறும் பட்சத்தில் விற்பனையாளர்கள் மீது விதைச்சட்டம் 1966, விதை விதிகள் 1968, விதைக்கட்டுப்பாட்டு ஆணை 1983 ஆகியவற்றின் கீழ் கடுமையான நடவடிக்கை எடுக்கப்படும்.
இவ்வாறு அதில் அவர் கூறி உள்ளார்.