மது குடிப்பதில் ஏற்பட்ட தகராறில் உருட்டு கட்டையால் தாக்கப்பட்ட கட்டிட தொழிலாளி சாவு; உறவினர் கைது

திருவெறும்பூர், 

திருச்சி மாவட்டம் திருவெறும்பூர் அருகே உள்ள மேலகுமரசேபுரம் பிள்ளையார் கோவில் தெருவைச் சேர்ந்தவர் தமிழரசன் (வயது 34). கட்டிட தொழிலாளியான இவர், கடந்த 11-ந் தேதி அப்பகுதியில் உள்ள மதுக்கடையில் மதுக்குடித்து கொண்டிருந்தார். 

அப்போது அங்கு வந்த அவரது உறவினரான அர்ஜூன் (35) என்பவருக்கும், தமிழரசனுக்கும் இடையே  தகராறு ஏற்பட்டது. இதில், ஆத்திரம் அடைந்த அர்ஜூன் உருட்டு கட்டையால் தாக்கியதில் தமிழரசனுக்கு தலையில் பலத்த காயம் ஏற்பட்டது. ரத்தம் வெளியேறி உயிருக்கு போராடிக் கொண்டிருந்த அவரை, அப்பகுதி மக்கள் மீட்டு திருச்சி அரசு மருத்துவமனையில் சிகிச்சைக்காக சேர்த்தனர். 

தொடர்ந்து மேல்சிகிச்சைக்காக தனியார் மருத்துவமனையில் அனுமதிக்கப்பட்டிருந்த தமிழரசன் சிகிச்சை பலனின்றி நேற்று உயிரிழந்தார். இது குறித்து திருவெறும்பூர் போலீசார் கொலை வழக்குப்பதிவு செய்து, அவரது உறவினரான அர்ஜூனை கைது செய்தனர்.