தளி அருகே கொள்ளை அடிக்க சதி திட்டம் தீட்டிய 3 பேர் கைது-2 பேர் தப்பி ஓட்டம்

தேன்கனிக்கோட்டை:

தளி போலீஸ் இன்ஸ்பெக்டர் சரவணன், சப்-இன்ஸ்பெக்டர் மஞ்சுநாதன் மற்றும் போலீசார் ஒசபுரம் முனீஸ்வரன் கோவில் அருகில் ரோந்து சென்றனர். அப்போது அங்கு 5 பேர் அமர்ந்து பேசிக்கொண்டிருந்தனர். அதில் 2 பேர் போலீசாரை கண்டதும் தப்பி ஓடி விட்டனர்.

இதனால் சந்தேகம் அடைந்த போலீசார் மற்ற 3 பேரையும் பிடித்து விசாரணை நடத்தினர். அதில் அவர்கள், தளி ஜெயந்தி காலனியை சேர்ந்த லட்சுமிபதி என்கிற பதி (வயது 27), ஆசிக் (23), சங்கேப்பள்ளி திலிப்குமார் (25) என்பதும், தப்பி ஓடிய 2 பேரும் தளி ஜெயந்த் காலனியை சேர்ந்த அனில் என்கிற சுனில்குமார் (26), கர்நாடக மாநிலம் ஆனேக்கல் கவனஹோசஹள்ளியை சேர்ந்த கார்த்திக் (26) என்பதும் தெரிய வந்தது. 

மேலும் இவர்கள் 5 பேரும் சேர்ந்து தளி பகுதியில் கொள்ளை அடிக்க சதி திட்டம் தீட்டியதும், கடந்த ஏப்ரல் மாதம் 12-ந் தேதி தளியில் நரேஷ் என்பவர் கொலை செய்யப்பட்ட வழக்கில் கைதாகி, சமீபத்தில் சிறையில் இருந்து ஜாமீனில் வெளியே வந்ததும் கண்டுபிடிக்கப்பட்டது. இதையடுத்து போலீசார் வழக்குப்பதிவு செய்து லட்சுமிபதி, ஆசிக், திலிப்குமார் ஆகிய 3 பேரையும் கைது செய்தனர். மேலும் தப்பி ஓடிய சுனில்குமார், கார்த்திக் ஆகியோரை வலைவீசி தேடி வருகிறார்கள்.