வேலகவுண்டம்பட்டி‌ அருகே மோட்டார் சைக்கிள்கள் மோதல்; விவசாயி பலி

பரமத்திவேலூர்,

நாமக்கல் மதுரைவீரன்‌ கோவில் புதூரை சேர்ந்தவர் பழனிசாமி (வயது 50). விவசாயி. இவர் தனது பேரன் சரவணனுடன் (10) சொந்த வேலையாக நேற்று முன்தினம் இரவு வேலகவுண்டம்பட்டிக்கு தனது மோட்டார் சைக்கிளில் வந்தார். பின்னர் மீண்டும் நாமக்கல் நோக்கி சென்று கொண்டிருந்தார்.

அப்போது வேலகவுண்டம்பட்டி அருகே சிங்கிலிபட்டியில் உள்ள பெட்ரோல் விற்பனை நிலையத்தில் பெட்ரோல் நிரப்புவதற்காக சாலையை கடக்க முயன்றார். அந்த சமயம் நாமக்கல்லில் இருந்து ‌வேலகவுண்டம்பட்டி நோக்கி வந்த மோட்டார் சைக்கிள் பழனிசாமி ஓட்டி சென்ற மோட்டார்சைக்கிள் மீது பயங்கரமாக மோதியது. 

இந்த விபத்தில் தூக்கி வீசப்பட்டு பலத்த காயம் அடைந்த பழனிசாமி‌ சம்பவ இடத்திலேயே ‌பலியானார். இதை பார்த்து அதிர்ச்சி அடைந்த அந்த வழியாக சென்றவர்கள் படுகாயம் அடைந்த சிறுவன் சரவணனையும் மற்றொரு மோட்டார் சைக்கிளில் வந்த திருச்செங்கோடு குச்சிபாளையத்தை சேர்ந்த அதியரசு (30) ஆகியோரை மீட்டு நாமக்கல்லில் உள்ள ஒரு தனியார் மருத்துவமனைக்கு சிகிச்சைக்காக ‌அனுப்பி வைத்தனர். 

மேலும் இந்த விபத்து குறித்து தகவல் அறிந்து சம்பவ இடத்திற்கு வந்த வேலகவுண்டம்பட்டி போலீசார் உயிரிழந்த பழனிசாமியின் உடலை மீட்டு நாமக்கல் அரசு மருத்துவமனைக்கு பிரேத பரிசோதனைக்காக அனுப்பி வைத்தனர். இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகின்றனர்.