காட்டாங்கொளத்தூர் பஸ் நிறுத்தம் அருகே வாகனம் மோதி தொழிலாளி பலி

வண்டலூர்,

செங்கல்பட்டு மாவட்டம் காட்டாங்கொளத்தூர் பஜனை கோவில் தெருவை சேர்ந்தவர் அரிபாபு (வயது 43). கூலித்தொழிலாளி.

நேற்று முன்தினம் இரவு காட்டாங்கொளத்தூர் பஸ் நிறுத்தம் அருகே அரிபாபு சாலையை கடக்கும் போது அந்த வழியாக சென்னை நோக்கி வந்த அடையாளம் தெரியாத வாகனம் கண்ணிமைக்கும் நேரத்தில் அவர் மீது மோதியது.

இதில் பலத்த காயம் அடைந்த அவர் சம்பவ இடத்திலேயே துடிதுடித்து பரிதாபமாக இறந்தார்.

இது குறித்து தகவல் அறிந்த மறைமலைநகர் போலீசார் சம்பவ இடத்திற்கு விரைந்து சென்று அரிபாபுவின் உடலை கைப்பற்றி பிரேத பரிசோதனைக்காக செங்கல்பட்டு அரசு ஆஸ்பத்திரிக்கு அனுப்பி வைத்தனர். இந்த விபத்து குறித்து மறைமலைநகர் போலீசார் வழக்குப்பதிவு செய்து அரிபாபு மீது மோதிய வாகனம் குறித்து ஜி.எஸ்.டி. சாலையில் உள்ள கண்காணிப்பு கேமராவை போலீசார் ஆய்வு செய்து வருகின்றனர்.