போக்குவரத்து அறிவிப்பு பலகை மீது மோட்டார் சைக்கிள் மோதி விவசாயி பலி

பெரம்பலூர்:

பெரம்பலூர் மாவட்டம், வேப்பந்தட்டை தாலுகா, அயன்பேரையூர் கிராமத்தை சேர்ந்தவர் மதியழகன் (வயது 54). விவசாயியான இவர் நேற்று காலை மோட்டார் சைக்கிளில் பெரம்பலூருக்கு வந்துவிட்டு, மாலையில் வீட்டிற்கு திரும்பி சென்று கொண்டிருந்தார். பெரம்பலூர்-எளம்பலூர் சாலையில் ராஜீவ்காந்தி நகரை கடந்து சென்றபோது சாலையோரத்தில் இருந்த போக்குவரத்து அறிவிப்பு இரும்பு பலகையின் மீது மோட்டார் சைக்கிள் பயங்கரமாக மோதியது.

இதில் தலையில் பலத்த அடிபட்டு சாலையோர பள்ளத்தில் தூக்கி வீசப்பட்ட மதியழகன் சம்பவ இடத்திலேயே பரிதாபமாக உயிரிழந்தார். மேலும் போக்குவரத்து அறிவிப்பு இரும்பு பலகையும் சாய்ந்து சாலையோர பள்ளத்தில் விழுந்தது. இது பற்றி தகவலறிந்து வந்த பெரம்பலூர் போலீசார் மதியழகனின் உடலை கைப்பற்றி பிரேத பரிசோதனைக்காக பெரம்பலூர் அரசு மருத்துவமனைக்கு அனுப்பி வைத்தனர். மேலும் இது தொடர்பாக வழக்குப்பதிவு செய்து விசாரணை நடத்தி வருகின்றனர்.