செய்துங்கநல்லூர் அருகே மோட்டார் சைக்கிள் விபத்தில் வாலிபர் பலி

செய்துங்கநல்லூர் அருகே உள்ள வி.கோவில்பத்து தெருவை சேர்ந்தவர் பரமசிவன். இவரது மகன் பாலாஜி (வயது 26). கூலி தொழிலாளி. திருமணமாகவில்லை.

இவர் நேற்று மாலையில் வி.கோவில்பத்தில் இருந்து நட்டார்குளம் கிராமத்திற்கு சென்றுவிட்டு செய்துங்கநல்லூருக்கு மோட்டார் சைக்கிளில் சென்று கொண்டிருந்தார். விட்டிலாபுரம் சாலையின் வழியாக மோட்டார் சைக்கிளில் பாலாஜி வந்து கொண்டு இருந்தார். அப்போது எதிர்பாராத விதமாக அவரது மோட்டார் சைக்கிள் நிலை தடுமாறி அருகில் இருந்த பனைமரத்தில் மோதியது. இதில் படுகாயமடைந்த அவரை அக்கம் பக்கத்தினர் மீட்டு பாளையங்கோட்டை ஐகிரவுண்டு அரசு மருத்துவமனையில் சிகிச்சைக்காக சேர்த்தனர். அவர் ஏற்கெனவே இறந்து விட்டதாக மருத்துவர்கள் தெரிவித்தனர்.

இதுகுறித்து செய்துங்கநல்லூர் போலீஸ் இன்ஸ்பெக்டர் ராஜசுந்தர் வழக்கு பதிவு செய்து விசாரணை நடத்தி வருகிறார்.