மொபட் மீது சரக்கு வேன் மோதி தொழிலாளி பலி

கரூர் மாவட்டம், குளித்தலை அருகே உள்ள மணத்தட்டை சங்கிலிராயன் கோவில் தெருவை சேர்ந்தவர் கோடீஸ்வரன் (வயது 43). கூலி தொழிலாளியான இவர், நேற்று முன்தினம் தனது மொபட்டில் திருச்சி-கரூர் சாலையில் சென்று கொண்டிருந்தார். 

குளித்தலை நாப்பாளையம் அருகே சென்று கொண்டிருந்தபோது அதே சாலையில் எதிரே வந்த சரக்கு வேன் ஒன்று, கோடீஸ்வரன் ஓட்டி வந்த மொபட் மீது மோதியது. 

இதில் மொபட்டில் இருந்து தூக்கி வீசப்பட்ட கோடீஸ்வரன் படுகாயம் அடைந்து உயிருக்கு போராடினார். இதைக்கண்ட அங்கிருந்தவர்கள் படுகாயம் அடைந்த அவரை மீட்டு சிகிச்சைக்காக குளித்தலை அரசு மருத்துவமனைக்கு அனுப்பி வைத்தனர். அங்கு அவருக்கு முதலுதவி சிகிச்சை அளிக்கப்பட்டு, மேல்சிகிச்சைக்காக திருச்சி அரசு மருத்துவமனையில் அனுமதிக்கப்பட்டு சிகிச்சை பெற்று வந்தார். 

இந்தநிலையில் சிகிச்சை பலனின்றி கோடீஸ்வரன் பரிதாபமாக இறந்தார். இந்த விபத்து குறித்த புகாரின்பேரில், குளித்தலை போலீசார் வழக்குப்பதிவு செய்து விசாரணை நடத்தி வருகின்றனர்.