கரூர் மாவட்டத்தில் புதிதாக 12 பேருக்கு கொரோனா

கரூர் மாவட்டத்தில் கொரோனா பரவலை கட்டுப்படுத்தும் விதமாக மாவட்ட நிர்வாகம் சார்பிலும் பல்வேறு முன்னெச்சரிக்கை நடவடிக்கைகள் எடுக்கப்பட்டு வருகின்றன. இதன் காரணமாக தொற்று மிகவும் குறைந்து வருகிறது. அந்தவகையில் கரூர் மாவட்டத்தில் நேற்று புதிதாக 12 பேர் கொரோனா தொற்றால் பாதிக்கப்பட்டுள்ளதாக சுகாதாரத்துறை சார்பில் தெரிவிக்கப்பட்டுள்ளது. அவர்கள் அனைவரும் கரூர் அரசு மருத்துவக்கல்லூரி மருத்துவமனை மற்றும் தனியார் மருத்துவமனைகளில் சிகிச்சைக்காக அனுமதிக்கப்பட்டுள்ளனர்.  இந்தநிலையில் ஏற்கனவே மருத்துவமனைகளில் சிகிச்சை பெற்று வந்த 18 பேர் குணமடைந்ததால் அவர்கள் அனைவரும் டிஸ்சார்ஜ் செய்யப்பட்டு வீட்டிக்கு அனுப்பி வைக்கப்பட்டனர்.  தற்போதைய நிலவரப்படி 180 பேர் கொரோனாவுக்கு சிகிச்சை பெற்று வருகின்றனர்.கரூர் மாவட்டத்தில் கடந்த சில வாரங்களுக்கு முன்பு கொரோனா தொற்றால் 100-க்கும் மேற்பட்டவர்கள் பாதிக்கப்பட்டு வந்தனர். தற்போது ஒற்றை இலக்க எண்ணிற்கு கொரோனா தொற்று வந்துள்ளது. இதனால் பொதுமக்கள் நிம்மதி அடைந்து உள்ளனர். மேலும் பொதுமக்கள் வெளியே செல்லும்போது முககவசம் அணிய வேண்டும், சமூக இடைவெளியை கடைபிடிக்க வேண்டும் என மாவட்ட நிர்வாகம் மற்றும் சுகாதாரத்துறையினர் அறிவுறுத்தி வருவது குறிப்பிடத்தக்கது.