பேரளம் அருகே ஸ்கூட்டரில் சென்ற பெண்ணிடம் சங்கிலி பறிப்பு - மோட்டார் சைக்கிளில் வந்த மர்ம நபர்களுக்கு வலைவீச்சு

நன்னிலம்,

திருவாரூர் மாவட்டம் பேரளம் அருகே உள்ள கம்பூர் கிராமத்தை சேர்ந்தவர் அமுதவல்லி(வயது50). சம்பவத்தன்று அமுதவல்லி நன்னிலம் அருகே உள்ள முடிகொண்டான் பகுதிக்கு ஸ்கூட்டரில் சென்றார். பின்னர் அவர் ஊர் திரும்பிக்கொண்டிருந்தார். திருவாரூர் - மயிலாடுதுறை சாலையில் அவர் சென்று கொண்டிருந்த போது அகர கடுவங்குடி அருகே அமுதவல்லியை பின்தொடர்ந்து மோட்டார் சைக்கிளில் 2 பேர் வந்தனர். அவர்கள் அமுதவல்லியின் ஸ்கூட்டர் அருகே சென்று திடீரென அவர் கழுத்தில் அணிந்திருந்த 2 பவுன் சங்கிலியை பறித்துக்கொண்டு மின்னல் வேகத்தில் சம்பவ இடத்தில் இருந்து தப்பி சென்று விட்டனர்.

திடீரென தனது கழுத்தில் இருந்த சங்கிலியை மர்ம நபர்கள் பறித்து சென்றதால் அதிர்ச்சி அடைந்த அமுதவல்லி இது குறித்து பேரளம் போலீசில் புகார் அளித்தார். இதன்பேரில் போலீசார் வழக்குப்பதிவு செய்து சங்கிலியை பறித்து சென்ற மர்ம நபர்களை தேடி வருகிறார்கள். ஸ்கூட்டரில் சென்ற பெண்ணிடம் மர்ம நபர்கள் சங்கிலியை பறித்து சென்ற சம்பவம் பேரளம் பகுதியில் பரபரப்பை ஏற்படுத்தி உள்ளது.