கீழ்வேளூர் பகுதியில் சேதமடைந்த சாலைகளை சீரமைக்க வேண்டும் - ஒன்றியக்குழு கூட்டத்தில் வலியுறுத்தல்

சிக்கல்,

கீழ்வேளூர்.ஊராட்சி ஒன்றிய அலுவலகத்தில் ஓன்றியக்குழு கூட்டம் தலைவர் வாசுகி நாகராஜன் தலைமையில் நடந்தது. கூட்டத்திற்கு வட்டார வளர்ச்சி அலுவலர்கள் தியாகராஜன், ராஜகோபால் ஆகியோர் முன்னிலை வகித்தார்.

கூட்டத்தில் உறுப்பினர்கள் பேசியதாவது :-.

கண்ணன் (தி.மு.க.) :-தேவூர் ஊராட்சியில் பிரதம மந்திரி வீடு கட்டும் திட்டத்தில் பயன் பெறும் பயனாளிகள் சரியானபடி கணக்கெடுப்பு நடத்தபடவில்லை, அதை முறையாக கணக்கெடுக்க வேண்டும். தேவூர் ஊராட்சியில் தாழ்வாக செல்லும் மின் கம்பிகளை மாற்றுவதற்கு 20-க்கு மேற்பட்ட மின் கம்பங்கள் 3 மாதத்திற்கு முன்பு நடப்பட்டது. இதுவரை அதற்கு உரிய மின்கம்பிகள், இணைப்புகள் கொடுக்கப்படாமல் உள்ளது. அதற்கு உரிய நடவடிக்கை எடுக்க வேண்டும்.

தேன்மொழி. (அ.தி.மு.க.) :- அகரகடம்பனூர் ஊராட்சி ராமர்மட சாலை, திருக்கண்ணங்குடி சன்னதி தெரு சாலைகள் சேதமடைந்து குண்டும், குழியுமாக உள்ளது. அதை சீர் செய்ய வேண்டும். கோவில் கடம்பனூரில் 30 ஆயிரம் கொள்ளளவு கொண்ட மேல்நிலை நீர்த்தேக்க தொட்டி அமைத்து தரவேண்டும்.

பிரவிணா (அ.தி.மு.க) :- வலிவலம், கொடியலத்தூர் ஊராட்சிகளில் குடியிருக்கும் பகுதிக்கு அருகே மயான கொட்டகை உள்ளது இதனால் சுகாதாரமற்ற காற்றினை மக்கள் சுவாசிக்கின்றனர்.எனவே மயான கொட்டகைக்கு புகைபோக்கி அமைத்து தரவேண்டும். வலிவலம் ஊராட்சி அலுவலக கட்டிடம் பழுதடைந்தள்ளது. அதை புதுபித்து தரவேண்டும்.

கருணாநிதி (தி.மு.க.) :- வடகரை ஊராட்சி வங்காரமாவடி சந்து வழி சாலை, வெங்கிடங்கால் ஊராட்சி வாழ ஒக்கூர், ஏழேகால் சாலைகளை சீரமைக்க நடவடிக்கை எடுக்கவேண்டும்.

ஒன்றிய குழு துணை தலைவர் புருஷோத்தமதாஸ் :- மணலூர் கீழத்தெரு தார் சாலை, காக்கழனி- வங்காரம் தார்சாலை, ஆந்தக்குடி தெற்கு தெரு தார் சாலைகள் சேதமடைந்துள்ளது. அதனை உடனடியாக சீர் செய்ய வேண்டும்.

ஒன்றியக்குழு தலைவர் வாசுகி நாகராஜன் :- தமிழக முதல்-அமைச்சராக பொறுப்பேற்றுள்ள மு.க.ஸ்டாலின் மற்றும் தமிழக அமைச்சர்களுக்கு வாழ்த்துக்களை தெரிவித்துகொள்கிறேன். முதல்-அமைச்சராக பதவி ஏற்று அரசின் நடவடிக்கைகளால் ஒரு நாள் பாதிப்பு 2 ஆயிரமாக குறைந்தது தமிழகத்தில் கொரோனா தடுப்பூசியை மக்கள் அதிக அளவில் செலுத்தி வருகின்றனர். இதற்கு முதல்-அமைச்சருக்கு நன்றியை தெரிவித்து கொள்கிறேன்.இவ்வாறு விவாதம் நடைபெற்றது.

கூட்டத்தில் ஒன்றிய குழு உறுப்பினர்கள் பாலையா, இல்முன்னிசா, ஹபிப்கனி வாசுகி, ரேவதி, மற்றும் அதிகாரிகள் உள்பட பலர் கலந்து கொண்டனர்.