உயிருக்கு போராடிய அண்ணனும் சாவு

தனது வீட்டில் மதுகுடித்த கும்பலை கண்டித்தவர் படுகொலை செய்யப்பட்ட சம்பவத்தில், படுகாயம் அடைந்த அவருடைய அண்ணனும் பரிதாபமாக இறந்தார். மருத்துவ மாணவர்களான அவர்கள் கொல்லப்பட்ட சம்பவம் இரட்டைக்கொலை வழக்காக மாற்றப்பட்டுள்ளது.
சிவகங்கை வண்டவாசி ரோடு முத்துநகரை சேர்ந்தவர் இருதயராஜ் (வயது 60). இவருடைய மனைவி ராணி (58). இவர்களுக்கு ஜோசப் சேவியர் (25), கிறிஸ்டோபர் (20) ஆகிய 2 மகன்கள். இவர்கள் இருவரும் பிலிப்பைன்ஸ் நாட்டில் எம்.பி.பி.எஸ். படித்து வந்தனர்.
இதில் ஜோசப் சேவியர் 2-ம் ஆண்டும், கிறிஸ்டோபர் முதலாம் ஆண்டும் படித்தனர். தற்போது கொரோனா பரவல் காரணமாக 2 பேரும் வீட்டிலேயே ஆன்லைன் மூலம் படித்து வந்தனர்.
இவர்களுக்கு சொந்தமாக வண்டவாசியில் இருந்து அண்ணாமலை நகர் செல்லும் வழியில் விவசாய நிலம் உள்ளது. அந்த நிலத்தில் வீடு ஒன்றும் உள்ளது. அந்த வீட்டில் ஆள் இல்லை.
உடனே இருதயராஜ் தனது 2 மகன்களுடன் அந்த வீட்டுக்கு விரைந்து சென்றார். அவரது மகன்கள், அங்கு மது குடித்து கொண்டிருந்தவர்களிடம், “ஏன் இ்ங்கு வந்து மது குடிக்கிறீர்கள்?” என்று கேட்டுள்ளனர். ஏற்கனவே மதுபோதையில் இருந்த அந்த கும்பலை சேர்ந்தவர்கள், ஆத்திரத்தில் கையில் இருந்த கத்தியால் சரமாரியாக தந்தை, மகன்களை வெட்டி விட்டு அங்கிருந்து தப்பி ஓடி விட்டனர்.
இந்த சம்பவம் தொடர்பாக சிவகங்கை நகர் போலீசார் விசாரணை நடத்தி சிவகங்கையை அடுத்த கீழ வாணியங்குடியை சேர்ந்த மருதுபாண்டி (21), பாலாஜி (23) சிவகங்கை பொற்கைப்பாண்டியன் தெருவை சேர்ந்த நந்தகுமார் (20),வசந்த் (23) புதுக்குளத்தை சேர்ந்த சரவணன் (26), வாணியங்குடியை சேர்ந்த கருப்பு (22), தேவகோட்டையை சேர்ந்த அமரன் ஆனந்த் ஆகிய 7 பேர் மீது வழக்குபதிவு செய்தனர்.
இதற்கிடையே கத்திக்குத்து காயங்களுடன் சிவகங்கை அரசு ஆஸ்பத்திரியில் சிகிச்சை பெற்று வந்த ஜோசப் சேவியரின் உடல்நிலை நேற்று திடீரென்று மோசமானது. டாக்டர்கள் அவருக்கு தீவிர சிகிச்சை அளித்தும் பலனின்றி அவர் பரிதாபமாக இறந்தார்.
இதை தொடர்ந்து இந்த வழக்கை இரட்டை கொலை வழக்காக போலீசார் மாற்றி உள்ளனர். தனது வீட்டில் மது குடித்ததை தட்டி கேட்ட விவகாரத்தில் மருத்துவ மாணவர்களான அண்ணன்-தம்பி 2 பேரும் கொலை செய்யப்பட்ட சம்பவம் அந்த பகுதியில் பெரும் சோகத்தை ஏற்படுத்தி உள்ளது.