நிதி நிறுவனம் நடத்தி ரூ.60 லட்சம் மோசடி செய்தவர் கைது

விழுப்புரம், 

திண்டிவனம் பெலாக்குப்பத்தை சேர்ந்த சம்பந்தம் மகன் சிவா என்கிற சிவக்குமார் (வயது 45) என்பவர் கடந்த 10 ஆண்டுகளுக்கும் மேலாக திண்டிவனம்- செஞ்சி சாலையில் தனியார் நிதி நிறுவனம் நடத்தி வந்தார். இவர் திண்டிவனம் மற்றும் சுற்றுவட்டார பகுதி மக்களிடம் சென்று எங்கள் நிதி நிறுவனத்தில் சேர்ந்து மாதந்தோறும் பணம் கட்டினால் கூடுதலாக வட்டி தொகை தருவதாகவும், பல பரிசுப் பொருட்களை தருவதாகவும் கூறினார்.

இதை நம்பிய பொதுமக்கள், கடந்த 2 ஆண்டுகளாக அந்த நிதி நிறுவனத்தில் சேர்ந்து மாதந்தோறும் பணம் செலுத்தினர். 

பணத்தை பெற்ற அவர், அதனை உரியவர்களுக்கு வட்டியுடன் சேர்த்து திருப்பிக்கொடுக்காமல் ஏமாற்றி மோசடி செய்து விட்டார்.

இதுகுறித்து பாதிக்கப்பட்ட மக்கள், விழுப்புரம் மாவட்ட பொருளாதார குற்றப்பிரிவு போலீசில் புகார் செய்தனர். அதன் பேரில் போலீசார் வழக்குப்பதிவு செய்து விசாரணை நடத்தியதில் சிவக்குமார், 30-க்கும் மேற்பட்ட நபர்களிடம் இருந்து ரூ.60 லட்சம் பெற்று மோசடி செய்தது தெரியவந்தது. இதையடுத்து சிவக்குமாரை போலீசார் வலைவீசி தேடிவந்தனர். 

இந்நிலையில் நேற்று திண்டிவனம் பகுதியில் இருந்து வெளியூருக்கு தப்பிச் செல்ல முயன்ற சிவக்குமாரை போலீஸ் இன்ஸ்பெக்டர் ரேணுகாதேவி தலைமையிலான போலீசார் மடக்கிப்பிடித்து கைது செய்தனர். பின்னர் அவரை விழுப்புரம் மாஜிஸ்திரேட்டு கோர்ட்டில் ஆஜர்படுத்தி வேடம்பட்டு சிறையில் அடைத்தனர்.