பொதுமக்கள் விழிப்புணர்வுடன் இருந்தால் கொரோனாவில் இருந்து பாதுகாத்து கொள்ளலாம்- போலீஸ் சூப்பிரண்டு ஜெயக்குமார் பேச்சு

தூத்துக்குடி:

பொதுமக்கள் விழிப்புணர்வுடன் இருந்தால் கொரோனா பெருந்தொற்றில் இருந்து நம்மை பாதுகாத்து கொள்ளலாம் என்று போலீஸ் சூப்பிரண்டு ஜெயக்குமார் கூறினார்.

தூத்துக்குடி மாவட்ட போலீஸ் துறை மற்றும் வட்டார போக்குவரத்து துறை சார்பில் கொரோனா தொற்று 3-வது அலை பரவல் தடுப்பு முன்னெச்சரிக்கை நடவடிக்கை குறித்த விழிப்புணர்வு நிகழ்ச்சி தூத்துக்குடி இந்திய உணவு கழக குடோன் முன்பு நேற்று நடந்தது.

நிகழ்ச்சிக்கு மாவட்ட போலீஸ் சூப்பிரண்டு ஜெயக்குமார் தலைமை தாங்கி, பொதுமக்களுக்கு சானிடைசர், கபசுர குடிநீர் மற்றும் முக கவசங்கள் வழங்கினார். அப்போது அவர் கூறியதாவது:-

தூத்துக்குடி மாவட்டத்தில் கொரோனா 3-வது அலையை தடுக்கும் பொருட்டு பல்வேறு விழிப்புணர்வு நிகழ்ச்சிகள் கடந்த 4 நாட்களாக அரசின் வழிகாட்டுதலின்படி மாவட்டம் முழுவதும் நடத்தப்பட்டு வருகிறது.

தற்போது பரவி வரும் 3-ம் அலை கொரோனா பெருந்தொற்றிலிருந்து நம்மை பாதுகாத்து கொள்ள வருமுன் காப்போம் என்ற நோக்கத்தில் மாவட்டத்தின் அனைத்து இடங்களிலும் போலீஸ் துறை சார்பில் விழிப்புணர்வு ஏற்படுத்தப்பட்டு வருகிறது. பொதுமக்களுக்கு விழிப்புணர்வு இருந்தாலே கொரோனா பெருந்தொற்றிலிருந்து நம்மைக் காப்பாற்றி கொள்ளமுடியும்.

மேலும் பொதுமக்கள் முககவசம் அணியும்போது வாயையும் மூக்கையும் நன்றாக மூடியவாறு முக கவசம் அணிய வேண்டும், அதிலும் 2 முக கவசம் அணிவது மிகவும் நல்லது. சமூக இடைவெளியை கடைபிடிக்க வேண்டும். அடிக்கடி கைகளை சோப்பு மற்றும் கிருமிநாசினி கொண்டு சுத்தம் செய்ய வேண்டும். பொதுமக்கள் அனைவரும் கொரோனா தடுப்பூசி போட்டுக்கொள்ள வேண்டும், கொரோனா வைரஸ் பரவலை தடுப்பதற்கு அரசு அறிவித்துள்ள நெறிமுறைகளை கடைபிடித்து ஒத்துழைப்பு வழங்க வேண்டும்.

இவ்வாறு அவர் பேசினார்.

நிகழ்ச்சியில் தூத்துக்குடி நகர துணை போலீஸ் சூப்பிரண்டு கணேஷ், தென்பாகம் போலீஸ் இன்ஸ்பெக்டர் ஆனந்தராஜன், போக்குவரத்து பிரிவு இன்ஸ்பெக்டர் மயிலேறும்பெருமாள் மற்றும் தூத்துக்குடி வட்டார போக்குவரத்து அலுவலர் விநாயகம், தென்பாகம் போலீஸ் சப்-இன்ஸ்பெக்டர் சிவக்குமார், போக்குவரத்து பிரிவு சப்-இன்ஸ்பெக்டர் சுனைமுருகன் உள்பட பலர் கலந்து கொண்டனர்.