2-ம் நிலை காவலர் பணி: நீளம், உயரம் தாண்டுதல்,கயிறு ஏறுதல் தேர்வு தொடக்கம் முதல் நாளில் 464 பேர் தேர்ச்சி

சேலம்

தமிழ்நாடு சீருடை பணியாளர் தேர்வாணையம் சார்பில் 2-ம் நிலை காவலர்கள், சிறைக்காவலர்கள், தீயணைப்பு வீரர்கள் என மொத்தம் 10 ஆயிரத்துக்கும் மேற்பட்ட பணியிடங்களை நிரப்புவதற்கான எழுத்து தேர்வு கடந்த ஆண்டு நடைபெற்றது. இந்த தேர்வில் சேலம், நாமக்கல் மாவட்டங்களை சேர்ந்த 3 ஆயிரத்து 913 பேர் தேர்ச்சி பெற்றனர்.

தேர்வான ஆண்கள் மற்றும் பெண்களுக்கான முதற்கட்ட உடல்தகுதி தேர்வு சேலம் குமாரசாமிப்பட்டியில் உள்ள மாவட்ட ஆயுதப்படை மைதானத்தில் கடந்த வாரம் தொடங்கி நேற்று முன்தினம் வரை நடைபெற்றது. இதில் நாமக்கல்லை சேர்ந்த திருநங்கை ஒருவர் உள்பட 2 ஆயிரத்து 215 பேர் தேர்ச்சி பெற்றனர். இந்த நிலையில் அவர்களுக்கான 2-ம் கட்ட உடல்தகுதி தேர்வு நேற்று தொடங்கியது.

இதற்காக 500 பேருக்கு அழைப்பு விடுக்கப்பட்டது. இதில் அனைவரும் பங்கேற்றனர். அவர்களுக்கு நீளம் அல்லது உயரம் தாண்டுதல், கயிறு ஏறுதல் மற்றும் 100 மீட்டர் அல்லது 400 மீட்டர் ஓட்டப்பந்தய தேர்வுகள் நடைபெற்றன. இதில் இளைஞர்கள் ஆர்வமுடன் பங்கேற்றனர்.

முதல் நாள் முடிவில் 464 பேர் தேர்ச்சி பெற்றனர். மற்றவர்கள் தேர்ச்சி பெறவில்லை. தேர்ச்சி பெற்றவர்களுக்கு அடுத்த கட்டமாக மருத்துவ பரிசோதனை நடைபெறும் என்று போலீஸ் உயர்அதிகாரிகள் தெரிவித்தனர்.