<
அவலாஞ்சி அணையில் மூழ்கி விவசாயி பலி
மஞ்சூர் அருகே அவலாஞ்சி அணையில் மூழ்கி விவசாயி பலியானார். மற்றொருவரின் கதி என்ன? என்பது தெரியவில்லை.
மஞ்சூர்,
மஞ்சூர் அருகே அவலாஞ்சி அணையில் மூழ்கி விவசாயி பலியானார். மற்றொருவரின் கதி என்ன? என்பது தெரியவில்லை.
அணையில் மூழ்கினர்
நீலகிரி மாவட்டம் மஞ்சூர் அருகே உள்ள எடக்காடு கிராமத்தை சேர்ந்தவர் மணிகண்டன்(வயது 43). இவருக்கு சொந்தமாக அவலாஞ்சி அணை கரையோரத்தில் தேயிலை தோட்டம் உள்ளது.
இந்த நிலையில் நேற்று காலையில் பச்சை தேயிலை பறிப்பதற்காக மணிகண்டன் மற்றும் அதே பகுதியை சேர்ந்த விவசாயிகள் பி.சரவணன்(42), ராமராஜன்(43), மற்றொரு சரவணன்(45) ஆகிய 4 பேர் தோட்டத்துக்கு சென்றனர். பின்னர் அவர்கள் மதியம் அங்கு அமர்ந்து உணவு சாப்பிட்டனர். பின்னர் கைகளை கழுவுவதற்காக அணை பகுதிக்கு சென்றனர்.
கை கழுவிய பிறகு பி.சரவணன் தண்ணீரில் இறங்கி குளித்ததாக கூறப்படுகிறது. அப்போது அவர் எதிர்பாராதவிதமாக ஆழமான பகுதிக்கு சென்றதாக தெரிகிறது. அவரை காப்பாற்ற ராமராஜன் முயன்றார். ஆனால் 2 பேரும் தண்ணீரில் மூழ்கி தத்தளித்தனர்.
பிணமாக மீட்பு
இதை கண்டு அதிர்ச்சி அடைந்த மணிகண்டன், மற்றொரு சரவணன் ஆகியோர் எமரால்டு போலீசாருக்கு தகவல் தெரிவித்தனர். உடனே போலீசார் சம்பவ இடத்துக்கு விரைந்து வந்தனர். மேலும் ஊட்டியில் இருந்து தீயணைப்பு நிலைய அதிகாரி பிரேமானந்தன் தலைமையில் வீரர்களும் வரவழைக்கப்பட்டனர். அவர்கள் தண்ணீரில் இறங்கி 2 பேரையும் தேடினர்.
தொடர்ந்து பி.சரவணன் பிணமாக மீட்கப்பட்டார். அவரது உடலை போலீசார் மீட்டு ஊட்டி அரசு தலைமை மருத்துவமனைக்கு பிரேத பரிசோதனைக்காக அனுப்பி வைத்தனர். ஆனால் ராமராஜன் கிடைக்கவில்லை. மேலும் அந்த நேரத்தில் மழை பெய்ததுடன், இரவு நேரமும் ஆனது.
இதனால் தேடும் பணி கைவிடப்பட்டது. இன்று (சனிக்கிழமை) தேடும் பணி மீண்டும் நடைபெறும். இந்த சம்பவம் குறித்து எமரால்டு போலீசார் வழக்குப்பதிவு செய்து விசாரணை நடத்தி வருகின்றனர்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
