எருமப்பட்டி அருகே மோட்டார்சைக்கிள்கள் மோதல்; தொழிலாளி பலி 2 பேர் படுகாயம்

எருமப்பட்டி:

திருச்சி மாவட்டம் வேலம்பட்டி பகுதியை சேர்ந்தவர் ராஜேந்திரன் (வயது 56). தொழிலாளி. இவர் நேற்று முன்தினம் சொந்த வேலை விஷயமாக நாமக்கல் சென்று விட்டு மீண்டும் வேலம்பட்டிக்கு தனது மோட்டார்சைக்கிளில் சென்று கொண்டு இருந்தார். அப்போது எருமப்பட்டி அருகே பவித்திரம் ஏரிக்கரையில் சென்று கொண்டிருந்தபோது, ஏரிக்கரையின் ஓரத்தில் உள்ள மண் சாலையில் காளிபட்டியை சேர்ந்த வினோத் குமார் (20), 17 வயது சிறுவன் ஆகியோர் மோட்டார்சைக்கிளில் வந்து கொண்டிருந்தனர்.

அந்த சமயம் 2 மோட்டார்சைக்கிளும் பயங்கரமாக மோதி கொண்டது.  இந்த விபத்தில் ராஜேந்திரன் பலத்த காயம் அடைந்து சம்பவ இடத்திலேயே இறந்தார். வினோத்குமார் மற்றும் 17 வயது சிறுவனுக்கு பலத்த காயம் ஏற்பட்டது. அவர்களை அந்த வழியாக சென்றவர்கள் மீட்டு 108 ஆம்புலன்ஸ் மூலம் நாமக்கல் அரசு மருத்துவமனைக்கு சிகிச்சைக்காக அனுப்பி வைத்தனர். இதுகுறித்து எருமப்பட்டி போலீசார் வழக்குப்பதிவு செய்து விசாரணை நடத்தி வருகின்றனர்.

=======