நிலப்பிரச்சினையில் சகோதரர்கள் 4 பேர் அரிவாளால் வெட்டி படுகொலை

பாகல்கோட்டை: பாகல்கோட்டை அருகே நிலப்பிரச்சினையில் சகோதரர்கள் 4 பேர் அரிவாளால் வெட்டி படுகொலை செய்யப்பட்ட பயங்கரம் நடந்துள்ளது. வெறிச்செயலில் ஈடுபட்ட மர்மநபர்களை போலீசார் வலைவீசி தேடிவருகிறார்கள்.

பாகல்கோட்டை மாவட்டம் ஜமகண்டி தாலுகா மதுரகண்டி கிராமத்தைச் சோ்ந்தவர் அனுமந்தா உதஹட்டி(வயது 45). இவரது சகோதரர்கள் பசப்பா உதஹட்டி(39), ஈஸ்வர் உதஹட்டி(37), மல்லப்பா(35) ஆகியோர் ஆவர். இவர்கள் 4 பேரும் விவசாயம் செய்து வந்தார்கள். நேற்று மாலையில் தோட்டத்தில் உள்ள வீட்டில் சகோதரர்கள் இருந்தார்கள். அப்போது அவர்களது தோட்டத்திற்கு ஒரு கும்பல் வந்தது.

அந்த கும்பலை சேர்ந்தவர்கள் தாங்கள் மறைத்து வைத்திருந்த அரிவாள் உள்ளிட்ட ஆயுதங்களால் சகோதரர்கள் 4 பேரையும் சரமாரியாக வெட்டினார்கள். மர்ம கும்பலிடம் இருந்து தப்பிக்க சகோதரர்கள் முயன்றனர். ஆனாலும் அவர்களை விடாமல் மர்மநபர்கள் வெட்டியதாக தெரிகிறது. இதில், பலத்த வெட்டுக்காயம் அடைந்த 4 பேரும் சம்பவ இடத்திலேயே ரத்த வெள்ளத்தில் பரிதாபமாக உயிர் இழந்தார்கள்.

உடனே அங்கிருந்து மர்மநபர்கள் தப்பி சென்று விட்டனர். சகோதரர்கள் 4 பேரும் கொலை செய்யப்பட்டு கிடப்பதை கண்டு பக்கத்து தோட்டத்தை சேர்ந்தவர்கள் அதிர்ச்சி அடைந்தார்கள். இதுபற்றி போலீசாருக்கு தகவல் தெரிவித்தனர். சம்பவ இடத்திற்கு ஜமகண்டி புறநகர் போலீசார் மற்றும் உயர் போலீஸ் அதிகாரிகள் விரைந்து வந்தனர்.

பின்னர் 4 பேரின் உடல்களையும் கைப்பற்றி போலீசார் விசாரணை நடத்தினார்கள். சம்பவ இடத்திற்கு பாகல்கோட்டை போலீஸ் சூப்பிரண்டும் விரைந்து வந்து விசாரணை மேற்கொண்டார்.

அப்போது அனுமந்தாவின் குடும்பத்திற்கும், அதே கிராமத்தை சிலருக்கும் நிலப்பிரச்சினை காரணமாக அடிக்கடி தகராறு ஏற்பட்டு வந்துள்ளது. இந்த நிலப்பிரச்சினை காரணமாக ஒரே குடும்பத்தில் 4 சகோதரர்கள் கொலை செய்யப்பட்டு இருக்கலாம் என்று போலீசார் சந்தேகிக்கின்றனர். இருப்பினும் கொலைக்கு வேறு ஏதாவது காரணமா? என்ற கோணத்தில் போலீசார் விசாரணை நடத்தி வருகிறார்கள்.

இதுகுறித்து ஜமகண்டி போலீசார் வழக்குப்பதிவு செய்து வெறிச்செயலில் ஈடுபட்டு தலைமறைவாகி விட்ட மர்மநபர்களை வலைவீசி தேடிவருகின்றனர். இந்த கொலை சம்பவம் பாகல்கோட்டையில் பெரும் பரபரப்பை ஏற்படுத்தி உள்ளது.