நாமக்கல் மாவட்டத்தில் 48 பேருக்கு கொரோனா-ஒருவர் பலி

நாமக்கல்:

தமிழக சுகாதாரத்துறை அறிவிப்பின்படி நேற்று முன்தினம் வரை நாமக்கல் மாவட்டத்தில் 48 ஆயிரத்து 730 பேர் கொரோனாவால் பாதிக்கப்பட்டு இருந்தனர். இதனிடையே 2 பேரின் பெயர்கள் பிற மாவட்ட பட்டியலில் இருந்து நாமக்கல் மாவட்ட பட்டியலுக்கு மாற்றப்பட்டது. அதனால் நாமக்கல் மாவட்டத்தில் கொரோனாவால் பாதிக்கப்பட்டோர் எண்ணிக்கை 48 ஆயிரத்து 732 ஆக உயர்ந்தது.

இந்த நிலையில் நேற்று 48 பேர் புதிதாக கொரோனா தொற்றால் பாதிக்கப்பட்டனர். இதனால் மாவட்டத்தில் கொரோனாவால் பாதிக்கப்பட்டோர் எண்ணிக்கை 48 ஆயிரத்து 780 ஆக உயர்ந்தது. நேற்று ஒரே நாளில் 64 பேர் கொரோனாவில் இருந்து குணமாகி வீடு திரும்பினர்.

இதனிடையே நாமக்கல் மாவட்டத்தில் நேற்று முன்தினம் வரை கொரோனாவுக்கு 469 பேர் பலியாகி இருந்தனர். இந்த நிலையில் திருச்செங்கோடு தனியார் ஆஸ்பத்திரியில் கொரோனாவுக்கு சிகிச்சை பெற்று வந்த 74 வயது முதியவர் நேற்று சிகிச்சை பலனின்றி இறந்தார். இதனால் நாமக்கல் மாவட்டத்தில் கொரோனாவால் பலியானோர் எண்ணிக்கை 470 ஆக உயர்ந்தது.

மாவட்டத்தில் இதுவரை 47 ஆயிரத்து 777 பேர் கொரோனாவில் இருந்து குணமாகி வீடு திரும்பி உள்ளனர். 533 பேர் சிகிச்சை பெற்று வருகின்றனர்.