மாவட்டத்தில் சிறந்ததாக தேர்வு; சுத்தமல்லி போலீஸ் நிலையத்துக்கு பரிசு

நெல்லை:

தமிழக முதல்-அமைச்சரின் மாவட்ட மற்றும் மாநகர அளவிலான சிறந்த போலீஸ் நிலையத்திற்கான பரிசு ஆண்டுதோறும் வழங்கப்பட்டு வருகிறது. தற்போது 2019-ம் வருடத்திற்கான பரிசு அறிவிக்கப்பட்டுள்ளது. 

இதில் நெல்லை மாவட்டத்தில் உள்ள போலீஸ் நிலையங்களில் சிறந்த போலீஸ் நிலையத்திற்கான பரிசு சுத்தமல்லி போலீஸ் நிலையத்திற்கு வழங்கப்பட்டுள்ளது.

இந்த பரிசை மாவட்ட போலீஸ் சூப்பிரண்டு மணிவண்ணன், சேரன்மாதேவி உட்கோட்ட துணை போலீஸ் சூப்பிரண்டு பார்த்திபன், சுத்தமல்லி போலீஸ் இன்ஸ்பெக்டர் ஜீன்குமார் ஆகியோரிடம் வழங்கினார்.

இந்த போலீஸ் நிலையத்தில் சிறப்பாக விசாரணை மேற்கொண்டு கொலை குற்றவாளிகளை விரைந்து கைது செய்ததற்கும், போதைப் பொருட்கள் விற்பனை செய்வதை விரைந்து தடுத்து நடவடிக்கை எடுத்ததற்கும், ஆவணங்கள் மற்றும் பதிவேடுகள் முறையான வகையில் பின்பற்றியதற்காகவும், போலீஸ் நிலையத்தின் சுற்றுப்புறத்தை தூய்மையாக வைத்திருந்ததற்காகவும் இந்த பரிசு வழங்கப்பட்டுள்ளது.