வெவ்வேறு விபத்துகளில் 2 பேர் பலி

கொள்ளிடம் டோல்கேட், செப்.4-
வெவ்வேறு விபத்துகளில் 2 பேர் பலியானார்கள்.
தனியார் நிறுவன ஊழியர்
முசிறி அருகே உள்ள அய்யம்பாளையம் புதுத்தெருவை சேர்ந்த ராஜேந்திரன் மகன் பாலமுருகன் (வயது 25). இவர் திருச்சியில் உள்ள ஒரு தனியார் நிறுவனத்தில் ஊழியராக பணியாற்றி வந்தார். நேற்று முன்தினம் இரவு வேலை முடிந்து பாலமுருகன் தனது மோட்டார் சைக்கிளில் ஊருக்கு சென்றுகொண்டிருந்தார்.
 திருச்சி - சேலம் தேசிய நெடுஞ்சாலையில் வாத்தலை அருகே உள்ள கிளியநல்லூர் என்ற இடத்தில் மோட்டார் சைக்கிளில் சென்று கொண்டிருந்தபோது எதிரே திருச்சி நோக்கி வந்த அடையாளம் தெரியாத வாகனம் பாலமுருகன் ஓட்டிச்சென்ற மோட்டார் சைக்கிள்  மீது மோதி விட்டு நிற்காமல் சென்றுவிட்டது. இதில் பலத்த காயம் அடைந்த அவர் சம்பவ இடத்திலேயே பரிதாபமாக இறந்தார். இது குறித்து வாத்தலை போலீசார் வழக்குப்பதிவு செய்து விபத்தை ஏற்படுத்திவிட்டு நிற்காமல் சென்ற வாகனம் குறித்து விசாரணை நடத்தி வருகின்றனர்.
துவரங்குறிச்சி
 இதேபோல் துவரங்குறிச்சி காமன்கோவில் தெருவைச் சேர்ந்தவர் ஹரிஹரன் (29). இவர் நேற்று முன்தினம் இரவு திருச்சி-மதுரை தேசிய நெடுஞ்சாலையில் துவரங்குறிச்சி அருகே நடந்து சென்றார். அப்போது, அந்த வழியாக வந்த அடையாளம் தெரியாத வாகனம் அவர் மீது மோதி விட்டு நிற்காமல் சென்றது. இதில் பலத்த காயம் அடைந்த அவரை அக்கம் பக்கத்தினர் மீட்டு சிகிச்சைக்காக துவரங்குறிச்சி அரசு மருத்துவமனைக்கு கொண்டு சென்றனர். அங்கு முதலுதவி சிகிச்சைக்குப்பின் மேல் சிகிச்சைக்காக திருச்சி அரசு மருத்துவமனைக்கு அனுப்பி வைக்கப்பட்ட அவர் செல்லும் வழியிலேயே பரிதாபமாக உயிரிழந்தார். இது குறித்து துவரங்குறிச்சி போலீசார் வழக்குப்பதிவு செய்து விசாரணை நடத்தி வருகின்றனர்.