நாமகிரிப்பேட்டையில் 510 மூட்டை மஞ்சள் ரூ.22 லட்சத்துக்கு ஏலம்

ராசிபுரம்:

நாமகிரிப்பேட்டையில் உள்ள ராசிபுரம் தாலுகா கூட்டுறவு வேளாண்மை உற்பத்தியாளர்கள் மற்றும் விற்பனை சங்க கிளை வளாகத்தில் நேற்று மஞ்சள் ஏலம் நடந்தது. இந்த ஏலத்தில் நாமகிரிப்பேட்டை, ஒடுவன்குறிச்சி, புதுப்பட்டி, முள்ளுக்குறிச்சி, மெட்டாலா, மங்களபுரம், பேளுக்குறிச்சி, அரியாக்கவுண்டம்பட்டி, ஆத்தூர், ஊனத்தூர் உள்பட பல்வேறு பகுதிகளில் இருந்து விவசாயிகள் மஞ்சளை விற்பனை செய்வதற்காக கொண்டு வந்திருந்தனர். 

விரலி ரகம் 400 மூட்டைகளும், உருண்டை ரகம் 100 மூட்டைகளும், பனங்காலி ரகம் 10 மூட்டைகளும் கொண்டு வரப்பட்டு இருந்தன.

இதில் விரலி ரகம் ஒரு குவிண்டால் குறைந்தபட்சமாக ரூ.6 ஆயிரத்து 199 முதல் அதிகப்பட்சமாக ரூ.8 ஆயிரத்து 580-க்கும், உருண்டை ரகம் ஒரு குவிண்டால் குறைந்தபட்சமாக ரூ.5 ஆயிரத்து 612 முதல் அதிகபட்சமாக ரூ.6 ஆயிரத்து 889-க்கும், பனங்காலி ரகம் ஒரு குவிண்டால் குறைந்தபட்சமாக ரூ.2 ஆயிரத்து 512 முதல் அதிகபட்சமாக ரூ.5 ஆயிரத்து 62-க்கும் விற்பனையானது. மொத்தம் 510 மூட்டை மஞ்சள் ரூ.22 லட்சத்திற்கு ஏலம் போனது.

ஏலத்தில் சேலம், ஈரோடு, நாமகிரிப்பேட்டை, ஒடுவன்குறிச்சி உள்பட பல்வேறு பகுதிகளிலிருந்து வியாபாரிகள் வந்திருந்து மஞ்சளை போட்டு போட்டு கொண்டு எடுத்தனர்.