<
தி.மு.க. பிரமுகர்களை அரிவாளால் வெட்டிய 2 பேர் கைது
திண்டுக்கல்லில், தி.மு.க. பிரமுகர்களை அரிவாளால் வெட்டிய சம்பவத்தில் 2 பேர் கைது செய்யப்பட்டனர்.
திண்டுக்கல்:
அரிவாள் வெட்டு
திண்டுக்கல் பெரியகடை வீதியை சேர்ந்தவர்கள் பாபு மீரான் (வயது 33), விஜயராஜ் (40). தி.மு.க. பிரமுகர்களான இவர்கள் 2 பேரும் நேற்று முன்தினம் மதியம் 2.30 மணி அளவில் மோட்டார் சைக்கிளில் சட்டாம்பிள்ளை தெருவில் வந்து கொண்டிருந்தனர்.
அப்போது, அந்த வழியாக மற்றொரு மோட்டார் சைக்கிளில் வந்த ஒரு கும்பல் வழிமறித்தது. பின்னர் இருவரையும் அரிவாளால் அந்த கும்பல் வெட்ட தொடங்கியது. இதில் காயமடைந்த விஜயராஜ் அவர்களை தள்ளிவிட்டு மோட்டார் சைக்கிளில் அங்கிருந்து தப்பிச்சென்றார்.
பின்னர் அவர், திண்டுக்கல் அரசு மருத்துவமனையில் சிகிச்சைக்காக அனுமதிக்கப்பட்டார்.
இதற்கிடையே மர்ம கும்பலிடம் இருந்து தப்பியோட முயன்ற பாபு மீரானை அந்த கும்பலை சேர்ந்தவர்கள் சுற்றிவளைத்து சரமாரியாக வெட்டிவிட்டு தாங்கள் வந்த மோட்டார் சைக்கிளில் தப்பிச்சென்றனர்.
2 பேர் கைது
படுகாயமடைந்த பாபு மீரான் சிகிச்சைக்காக திண்டுக்கல் அரசு மருத்துவமனையில் சேர்க்கப்பட்டு பின்னர் மேல்சிகிச்சைக்காக திண்டுக்கல்லில் உள்ள தனியார் மருத்துவமனையில் அனுமதிக்கப்பட்டார். அங்கு அவருக்கு தீவிர சிகிச்சை அளிக்கப்பட்டு வருகிறது.
பட்டப்பகலில் நடந்த இந்த கொலைவெறி தாக்குதல் சம்பவம் குறித்து நகர் வடக்கு போலீசார் வழக்குப்பதிவு செய்து விசாரணை நடத்தினர். மேலும் தப்பியோடியவர்களை பிடிக்க தனிப்படையும் அமைக்கப்பட்டது.
இந்த நிலையில் சம்பவம் நடந்த இடத்தில் உள்ள கண்காணிப்பு கேமராக்களில் பதிவான காட்சிகளை போலீசார் பார்வையிட்டு ஆய்வு செய்த போது, தி.மு.க. பிரமுகர்களை அரிவாளால் வெட்டியது பெரியகடைவீதி பகவதி அம்மன் கோவில் தெருவை சேர்ந்த நாகராஜ் (29), அதே பகுதியை சேர்ந்த சாதிக் பாட்ஷா (48) உள்பட 4 பேர் என்பது தெரியவந்தது.
இதையடுத்து நாகராஜ், சாதிக் பாட்ஷா ஆகியோரை தனிப்படை போலீசார் பஸ் நிலையம் அருகே மடக்கிப்பிடித்து கைது செய்தனர்.
முன்விரோதம்
பின்னர் அவர்களிடம் நடத்திய விசாரணையில், பெரியகடை வீதி பகுதியில் கொரோனா தடுப்பூசி போடும் முகாம் நடத்துவதில் பாபு மீரானுக்கும், நாகராஜ் உள்பட 4 பேருக்கும் தகராறு ஏற்பட்டதும், அதனால் ஏற்பட்ட முன்விரோதம் காரணமாக இந்த கொலை முயற்சி சம்பவம் நடந்ததும் தெரியவந்தது.
மேலும் தப்பியோடிய 2 பேரையும் தனிப்படை போலீசார் வலைவீசி தேடி வருகின்றனர்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
