<
‘நீட்’ தேர்வினை தடுக்கதமிழக அரசு அனைத்து முயற்சிகளையும் செய்து வருகிறது. அமைச்சர் துரைமுருகன் பேட்டி
நீட் தேர்வினை தடுக்க வேண்டிய அனைத்து முயற்சிகளையும் தமிழக அரசு செய்து வருகிறது என அமைச்சர் துரைமுருகன் கூறினார்.
காட்பாடி
நீட் தேர்வினை தடுக்க வேண்டிய அனைத்து முயற்சிகளையும் தமிழக அரசு செய்து வருகிறது என அமைச்சர் துரைமுருகன் கூறினார்.
மாணவியின் குடும்பத்துக்கு ஆறுதல்
வேலூர் மாவட்டம், காட்பாடி தாலுகாவில் உள்ள தலையாரம்பட்டு கிராமத்தைச் சேர்ந்த சவுந்தர்யா என்ற மாணவி நீட் தேர்வு எழுதிவிட்டு தோல்வி பயத்தில் நேற்று முன்தினம் தூக்குப்போட்டு தற்கொலை செய்து கொண்டார். அவருடைய வீட்டுக்கு நீர் வளத்துறை அமைச்சர் துரைமுருகன் நேற்று சென்று மாணவியின் பெற்றோருக்கு ஆறுதல் கூறினார். அப்போது, எம்.பி.க்கள் ஜெகத்ரட்சகன், கதிர் ஆனந்த், ஏ.பி.நந்தகுமார் எம்.எல்.ஏ. ஆகியோர் உடன் இருந்தனர்.
பின்னர் அமைச்சர் துரைமுருகன் நிருபர்களுக்கு பேட்டி அளித்தார்.
அப்போது அவர் கூறியதாவது:-
அனைத்து முயற்சிகளையும்...
நீட்தேர்வு எனும் கொடிய அரக்கனை மத்திய அரசு ஏவி உள்ளது. இன்னும் எத்தனை மாணவர்களின் உயிரை காவு வாங்க போகிறது என்று தெரியவில்லை. நீட் தேர்வினை தடுக்க வேண்டிய அனைத்து முயற்சிகளையும் தமிழக அரசு செய்து வருகிறது. தேர்வு என்பது இறுதி அல்ல. ஒரு முறை தோல்வி அடைந்தாலும் மறுமுறை தேர்ச்சி பெறலாம். மாணவர்கள் இதனை மனதில் கொண்டு தோல்வியை கண்டு துவண்டு விடக்கூடாது.
டெல்லியில் நடந்த விவசாய போராட்டத்தில் நூற்றுக்கும் மேற்பட்டோர் இறந்தும் செவி சாய்க்காத மத்திய அரசா மாணவர்களின் இறப்பிற்கு செவிசாய்க்க போகிறது?.
கண்ணீர் வீண்போகாது
நீட் தேர்வின் காரணமாக உயிர் இழந்த மாணவ, மாணவிகளின் பெற்றோர்களின் சோகமும், கண்ணீரும் வீண்போகாது இதற்கு கண்டிப்பாக தீர்வு காணப்படும்.
அ.தி.மு.க முன்னாள் அமைச்சர் கே.சி.வீரமணியின் வீடுகளில் லஞ்ச ஒழிப்புத்துறை போலீசார் சோதனை நடத்துவது குறித்து எனக்கு எதுவும் தெரியாது.
இவ்வாறு அவர் கூறினார்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
