தினத்தந்தி புகார் பெட்டி

பெரம்பலூர் மாவட்டம் ஆலத்தூர் வட்டம் புதுக்குறிச்சி கிராமத்தில் அம்பேத்கர் தெருவில்  பள்ளம் தோண்டி அதில் குடிநீர் குழாய் அமைத்துள்ளனர். இதனால் இந்த பள்ளத்தில் குழந்தைகள் விழுந்து காயம் அடைகின்றனர். மேலும் சாலையோரத்தில் பள்ளம் உள்ளதால் வாகன ஓட்டிகள் அவதிப்படுகின்றனர். எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்க வேண்டும். 

பாபு,  புதுக்குறிச்சி, பெரம்பலூர்.

கரூர் மாவட்டம் புலியூர் பஞ்சாயத்துக்கு உட்பட்ட பெரியார் நகர் தெருவில் மின்கம்பங்கள் நடப்பட்டு அப்பகுதியில் உள்ள வீடுகளுக்கு மின்சாரம் வினியோகம் செய்யப்பட்டு வருகிறது. இந்த நிலையில் அப்பகுதியில் உள்ள மின்கம்பம் பழுதடைந்து எப்போது வேண்டுமானாலும் கீழே விழும் நிலையில் உள்ளது. இதனை அறிந்த அதிகாரிகள் அதன் அருகே புதிய மின்கம்பத்தை நட்டுள்ளனர். ஆனால் இன்னும் பழைய மின்கம்பத்தில் இருந்து புதிய மின் கம்பத்திற்கு மின் இணைப்பு கொடுக்கப்படாமல் உள்ளது. எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்க வேண்டும். 

பொதுமக்கள்,  பெரியார் நகர், கரூர். 

அரியலூர் மாவட்டம், நாகமங்கலம் செல்லும் சாலையில் முனியங்குறிச்சி பிரிவு பாதை உள்ளது. மேலும் மு.புத்தூரில் இயங்கி வரும் தனியார் சுண்ணாம்புக்கல் சுரங்கத்திற்கு செல்லும் லாரிகள் தாறுமாறாக செல்வதால் விபத்துகள் ஏற்படும் அபாயகரமான சூழ்நிலை நிலவி வந்தது.  அதை கருத்தில் கொண்டு முனியங்குறிச்சி பிரிவு பாதையில் சில மாதங்களுக்கு முன்பு தனியார் சிமெண்டு தொழிற்சாலை சார்பில் உயர் மின் கோபுரம் அமைத்து கொடுக்கப்பட்டது. இதில் இருந்து போதிய அளவு வெளிச்சம் வராததால் அப்பகுதியில் எப்போதும் போல் காட்சி அளிக்கிறது. தற்போது உயர் மின் விளக்கு கோபுரம் இருக்கு ஆனால் இல்லை என்ற நிலையில் உள்ளது. எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்க வேண்டும். 

அருள்ராஜ், முனியங்குறிச்சி, அரியலூர். 

கரூர் மாவட்டம், குளித்தலை வட்டம், நங்கவரம் பேரூராட்சி எல்லைக்கு உட்பட்ட பகுதிகள் வார்டு எண் 12 நச்சலூர்- ரசம்பட்டி, தளிஞ்சி பஞ்சாயத்து  புரசம்பட்டி காலனி திருச்சி செல்லும் சாலை வரை ஆங்காங்கே சாலையில் பள்ளம் ஏற்பட்டு குண்டும் குழியுமாக காட்சி அளிக்கிறது. இதனால் வாகனங்கள் பழுது அடைவதுடன் அடிக்கடி விபத்துக்கள் ஏற்படுகிறது. எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்க வேண்டும். 

பொதுமக்கள், மேலப்பட்டி, கரூர். 

புதுக்கோட்டை மாவட்டம், குன்றாண்டார் கோவில் ஒன்றியம் பெரிய தம்பி உடையான்பட்டி ஊராட்சியில் உள்ள அண்டக்குளம் சாலை பழுதடைந்து குண்டும், குழியுமாக காட்சியளிக்கிறது. இந்த சாலை வழியாக வந்து கொண்டிருந்த 2 நகரப் பஸ்களும் கடந்த 2 ஆண்டுகளாக நிறுத்தப்பட்டு விட்டது. இதனால் சுமார் 16 கிராமங்களுக்கு போக்குவரத்து பாதிக்கப்பட்டுள்ளதால் அப்பகுதி மக்கள் பெரிதும் அவதிப்பட்டு வருகின்றனர். எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்க வேண்டும். 

மகிமை ராஜ், பெரிய தம்பி உடையான்பட்டி, புதுக்கோட்டை.

அரியலூர் மாவட்டம் ஜெயங்கொண்டம் அண்ணாநகரில் அதிக அளவில் குரங்குகள் காணப்படுகிறது. இந்த குரங்குகள் அப்பகுதியில் உள்ள வீடுகளில் புகுந்து தின்பண்டங்கள், மளிகை பொருட்கள் ஆகியவற்றை எடுத்துச் சென்று விடுகின்றன. மேலும் அப்பகுதியில் உள்ள மாமரம், கொய்யா மரங்களை சேதப்படுத்தி வருகிறது. மேலும் அப்பகுதியில் உள்ள பொதுமக்களை கடிக்க வருவது போல் அச்சுறுத்தி வருகிறது. எனவே இப்பகுதியில் உள்ள குரங்குகளை வனத்துறையினர் கூண்டு வைத்துப் பிடித்து வனப்பகுதிக்கு கொண்டு சென்று விட நடவடிக்கை எடுக்க வேண்டும். கலைச்செல்வன், ஜெயங்கொண்டம், அரியலூர்.

கரூர் மாவட்டம் கிருஷ்ணராயபுரம் ஒன்றியம் மகாதானபுரம் தீத்தாம்பாளையத்தில் முறையான கழிவுநீர் வாய்க்கால் அமைக்காததால் இப்பகுதியில் இருந்து வெளியேறும் கழிவுநீர் சாலையில் செல்கிறது. இதனால் அப்பகுதியில் அதிக அளவில் கொசுக்கள் உற்பத்தியாகி, டெங்கு, மலேரியா உள்ளிட்ட காய்ச்சல் அப்பகுதி மக்களுக்கு பரவ வாய்ப்பு உள்ளது. மேலும் கழிவுநீர் சாலையில் செல்வதால் அப்பகுதியில் துர்நாற்றம் வீசுகிறது. எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்க வேண்டும்.

பொதுமக்கள், தீத்தாம்பாளையம், கரூர்.

புதுக்கோட்டை  டவுன்  ராஜகோபாலபுரம் வாரிப்பட்டி பகுதியில் ஏராளமான பொதுமக்கள் வசித்து வருகின்றனர். சுமார் 4 ஆண்டு காலமாக நகராட்சி மூலம் குடிநீர் குழாய் பெற்று, குடிநீர் சரிவர   வருவதில்லை. இதனால் இப்பகுதி மக்கள் அவதிப்பட்டு வருகின்றனர். எனவே இதுகுறித்து சம்பந்தப்பட்ட அதிகாரிகள் நடவடிக்கை எடுக்க வேண்டும். 

முத்துகிருஷ்ணன், வாரிப்பட்டி, புதுக்கோட்டை.