புகார் பெட்டி

‘தினத்தந்தி’ புகார் பெட்டிக்கு வந்த மக்கள் குறைகள் தொடர்பான பதிவுகள் வருமாறு:-

கல்லணை - திருவையாறு சாலையில் பவனமங்கலம் கிராமம் உள்ளது.இந்த கிராமத்தில் மின்கம்பிகள் தாழ்வாக செல்கின்றன.  மின்கம்பிகள் மீது லாரி, பஸ்கள் உரசி அசம்பாவிதம் ஏற்பட்டு விடுமோ? என பொதுமக்கள் அச்சம் தெரிவிக்கின்றனர். எனவே தாழ்வாக செல்லும் மின் கம்பிகளை சீரமைக்க சம்பந்தப்பட்ட அதிகாரிகள் நடவடிக்கை எடுக்க வேண்டும் என்பதே அந்தப் பகுதி மக்களின் கோரிக்கையாகும்.
-தமிழ்செல்வன், திருவையாறு.

தஞ்சை மாவட்டம் கண்டிதம்பட்டு ஆதிதிராவிடர் தெருவில் 50-க்கும் மேற்பட்ட குடும்பத்தினர் வசித்து வருகின்றனர். இந்தப் பகுதிகளில் உள்ள வீடுகளில் இருந்து வெளியேறும் கழிவுநீர் செல்வதற்கு வசதியாக கழிவுநீர் வடிகால் அமைக்கப்படவில்லை. இதன் காரணமாக வீடுகளில் இருந்து வெளியேறும் கழிவுநீர் தெருவில் தேங்கி நிற்கிறது. கழிவுநீர் தேங்குவதால் தெரு முழுவதும் துர்நாற்றம் வீசுகிறது. மேலும் கழிவுநீரில் கொசுக்கள் உற்பத்தியாகி சுகாதார சீர்கேடு ஏற்பட்டு நோய் தொற்று ஏற்படும் அபாயம் உள்ளது. எனவே பொதுமக்களின் நலன் கருதி சம்மந்தப்பட்ட அதிகாரிகள் வீடுகளில் இருந்து வெளியேறும் கழிவுநீர் தெருவில் தேங்காதபடி, வடிகால் அமைத்துத் தர நடவடிக்கை எடுக்க வேண்டும் என்பதே அந்தப் பகுதி மக்களின் எதிர்பார்ப்பாகும்.
-பொதுமக்கள், கண்டிதம்பட்டு.

தஞ்சை மாவட்டம் பாபநாசம் அருகே ராஜகிரி கிராமம் உள்ளது. இந்த கிராமத்திலுள்ள வடக்குத் தெரு பகுதியில் குப்பைகள் தேங்கி கிடக்கின்றன. மேலும் அந்தப்பகுதியில் வைக்கப்பட்டுள்ள குப்பை தொட்டிகளிலும் குப்பைகள் நிறைந்து வழிகின்றன. இதனால் அந்த பகுதி முழுவதும் துர்நாற்றம் வீசுகிறது. சுகாதார சீர்கேடு ஏற்பட்டு நோய் தொற்று ஏற்படும் அபாயம் உள்ளது. அதுமட்டுமின்றி மழைக்காலங்களில் குப்பைகளுடன் கழிவுநீர், மழைநீர் தேங்கி சகதியாக மாறிவிடுகின்றன. எனவே சம்பந்தப்பட்ட அதிகாரிகள் பொதுமக்களின் நலன் கருதி ராஜகிரி வடக்கு தெரு பகுதிகளில் குவிந்து கிடக்கும் குப்பைகளை அகற்ற நடவடிக்கை எடுக்க வேண்டும் என்பதே அந்த பகுதி மக்களின் கோரிக்கையாகும்.
-முகமது இக்பால், ராஜகிரி.