மோட்டார் சைக்கிள்-மொபட் நேருக்கு நேர் மோதல்; முதியவர் பலி

அன்னவாசல் அருகே உள்ள கடம்பராயன்பட்டியை சேர்ந்தவர் சத்தியமூர்த்தி (வயது 72). இவர் மேட்டுசாலையில் உள்ள தனது மகன் கடையில் ஆயுதபூஜை விழா கொண்டாடிவிட்டு மருமகள் கஸ்தூரி (வயது 25), பேரன் சரண் (வயது 7) ஆகியோருடன்  கடம்பராயன்பட்டியில் உள்ள வீட்டிற்கு மோட்டார் சைக்கிளில் சென்றுள்ளார். 

புதுக்கோட்டை-இலுப்பூர் சாலையில் கடம்பராயன்பட்டி விளக்கு அருகே சென்றபோது எதிரே சென்னப்பநாயக்கன்பட்டியை சேர்ந்த ராஜேந்திரன் மகன் அருண்குமார் (15) என்பவர் ஓட்டி வந்த மொபட் சத்தியமூர்த்தி ஓட்டிவந்த மோட்டார் சைக்கிள் மீது நேருக்கு நேராக மோதியது.

இந்த விபத்தில் சத்தியமூர்த்தி, கஸ்தூரி, சரண், மற்றும் அருண்குமார் ஆகிய 4 பேரும் படுகாயம் அடைந்தனர். பின்னர் அருகில் இருந்தவர்கள் 4 பேரையும் மீட்டு இலுப்பூர் அரசு மருத்துவமனைக்கு அனுப்பி வைத்தனர். அங்கு அவர்களுக்கு டாக்டர்கள் தீவிர சிகிச்சை அளித்தனர். பின்னர் சத்திய மூர்த்தி, அருண்குமார் ஆகியோர் மேல் சிகிச்சைக்காக புதுக்கோட்டை அரசு மருத்துவக்கல்லூரி மருத்துவமனையில் அனுமதிக்கப்பட்டனர். அங்கு அவர்களுக்கு டாக்டர்கள் தீவிர சிகிச்சை அளித்து வந்தனர்.

இதனைதொடர்ந்து சத்தியமூர்த்தி மேல் சிகிச்சைக்காக தஞ்சாவூர் அரசு மருத்துவக்கல்லூரி மருத்துவமனையில் அனுமதிக்கப்பட்டு சிகிச்சை பெற்று வந்தார்.

இந்தநிலையில் சிகிச்சை பலனின்றி நேற்று காலை சத்தியமூர்த்தி இறந்தார். இந்த விபத்து குறித்து அன்னவாசல் போலீசார் வழக்குப்பதிவு செய்து விசாரணை நடத்தி வருகின்றனர்.