பனமரத்துப்பட்டி அருகே விபத்தில் 8-ம் வகுப்பு மாணவன் பலி

பனமரத்துப்பட்டி:

பனமரத்துப்பட்டி அருகே விபத்தில் 8-ம் வகுப்பு மாணவன் பலியானான்.

பனமரத்துப்பட்டி அருகே உள்ள ஜல்லூத்துப்பட்டி கிராமம் மஞ்சபாளி பகுதியை சேர்ந்தவர் மணி. இவருடைய மகன் கந்தசாமி (வயது 13). இவன் சாமகுட்டப்பட்டியில் உள்ள அரசு பள்ளியில் 8-ம் வகுப்பு படித்து வந்தான். இந்தநிலையில் நேற்று முன்தினம் கந்தசாமியும், இவனது நண்பன் நீலமோகனும் (13) மொபட்டில் குரால்நத்தம் சென்றனர்.  அவர்கள் மதியம் 1 மணிக்கு வீட்டுக்கு திரும்பி கொண்டிருந்தனர். மொபட்டை கந்தசாமி ஓட்டி சென்றான். கோணமடுவு பகுதி அருகே வந்தபோது முன்னால் சென்ற அரசு பஸ்சை முந்தி செல்ல முயன்றான். அப்போது எதிரே வந்த மோட்டார் சைக்கிள், மொபட் மீது மோதியது. இதில் நிலைத்தடுமாறிய மொபட் பஸ்சின் பக்கவாட்டில் மோதி சாலையில் சரிந்தது. 

இந்த விபத்தில் கந்தசாமி தலையில் பலத்த காயம் அடைந்து சம்பவ இடத்திலேயே பலியானான். நீலமோகன் லேசான காயம் அடைந்தான். அந்த வழியாக சென்றவர்கள் நீலமோகனை மீட்டு சிகிச்சைக்காக ஆஸ்பத்திரிக்கு அனுப்பி வைத்தனர். இந்த விபத்து குறித்து தகவல் அறிந்த பனமரத்துப்பட்டி போலீசார் அங்கு விரைந்து சென்றனர்.

அவர்கள் விபத்தில் பலியான கந்தசாமி உடலை கைப்பற்றி பிரேத பரிசோதனைக்காக சேலம் அரசு ஆஸ்பத்திரிக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து மோட்டார் சைக்கிளை ஓட்டி வந்த குரால்நத்தத்தை சேர்ந்த வெங்கடேஷ் (வயது 35) என்பவரை கைது செய்தனர்.