நாமக்கல் உழவர் சந்தையில் ரூ.6½ லட்சத்துக்கு காய்கறி, பழங்கள் விற்பனை

நாமக்கல்:

நாமக்கல் உழவர் சந்தையில் நேற்று 19¼ டன் காய்கறி மற்றும் பழங்கள் ரூ.6½ லட்சத்துக்கு விற்பனையானது.

நாமக்கல்- கோட்டை சாலையில் உழவர் சந்தை செயல்பட்டு வருகிறது. இங்கு நாமக்கல் மற்றும் அதன் சுற்றுவட்டார பகுதிகளில் விளையும் காய்கறிகளை விவசாயிகள் விற்பனை செய்து வருகின்றனர். இந்த சந்தையில் தற்போது கொரோனா பரவலை தடுக்கும் வகையில் 50 சதவீத விவசாயிகள் மட்டுமே அனுமதிக்கப்படுகிறார்கள். அதாவது ஒரு நாள் விட்டு ஒரு நாள் விவசாயிகள் தங்கள் விளை நிலங்களில் விளையும் காய்கறி மற்றும் பழங்களை விற்பனை செய்ய அனுமதி அளிக்கப்படுகிறது.

அந்த வகையில் நேற்று 17 டன் காய்கறிகள் மற்றும் 2¼ டன் பழங்கள் விற்பனைக்கு வந்து இருந்தன. இவை ரூ.6 லட்சத்து 53 ஆயிரத்து 830-க்கு விற்பனை செய்யப்பட்டன. இவற்றை 1,840 பேர் வாங்கி சென்றனர்.

நாமக்கல் உழவர் சந்தையில் நேற்று தக்காளி கிலோ ரூ.40-க்கும், கத்தரி கிலோ ரூ.48-க்கும், வெண்டைக்காய் கிலோ ரூ.30-க்கும், புடலங்காய் கிலோ ரூ.28-க்கும், பீர்க்கன் கிலோ ரூ.40-க்கும், பீட்ரூட் கிலோ ரூ.52-க்கும், கேரட் கிலோ ரூ.72-க்கும், பீன்ஸ் கிலோ ரூ.72-க்கும், முட்டைக்கோஸ் கிலோ ரூ.20-க்கும், இஞ்சி கிலோ ரூ.70-க்கும் விற்பனை செய்யப்பட்டன.

சின்ன வெங்காயம் கிலோ ரூ.25-க்கும், பெரிய வெங்காயம் கிலோ ரூ.48-க்கும் விற்பனை செய்யப்பட்டன. காய்கறிகளின் வரத்து அதிகரித்து உள்ள நிலையில், புரட்டாசி மாதம் என்பதால் அவற்றின் விலையும் சற்று உயர்ந்து இருப்பதாக உழவர் சந்தை அதிகாரிகள் தெரிவித்தனர்.

கடந்த வாரம் கிலோ ரூ.36-க்கு விற்பனை செய்யப்பட்ட தக்காளி நேற்று கிலோவுக்கு ரூ.4 அதிகரித்து விற்பனையானது குறிப்பிடத்தக்கது.